ޝަރީއަތްތައް ނުނިމި ލަސްވާ މައްސަލަ ޖޭއެސްސީން ބަލަން ފަށަނީ

ކޯޓުތަކުގައި ހިނގަމުން އަންނަ މައްސަލަ ނުނިމި ލަސްވާ ސަބަބު ހޯދައި ބެލުމުގެ މަސައްކަތް ފަށަން ޖުޑީޝަލް ސާވިސް ކޮމިޝަން (ޖޭއެސްސީ) ން މިއަދު ނިންމައިފި އެވެ.

އެ ކޮމިޝަނުން ބޭއްވި ނޫސްވެރިންގެ ބައްދަލުވުމެއްގައި، ޑިރެކްޓަރު ހަސަން ޒަހީން ވިދާޅުވީ ކޯޓުތަކުގައި ހިނގާ މައްސަލަތައް ނުނިމި އާދަޔާ ޚިލާފަށް ލަސްވަމުންދާ ކަމުގެ ޝަކުވާ ޖޭއެސްސީ އަށް ލިބެމުންދާ ކަމަށާއި އެހެންވެ، އެކަން ބެލުމަށް މިއަދު ނިންމާފައިވާ ކަމަށެވެ. އަދި މައްސަލަތައް ލަސްވާން މެދުވެރިވާ ސަބަބުތައް ހޯދުމަށް ފަހު، އެއީ ފަނޑިޔާރުންގެ ސަބަބުން ދިމާވާ ކަމެއް ނަމަ، އެކަން ސުލޫކީ މައްސަލައެއްގެ ގޮތުގައި ބަލަން ކަނޑައަޅާފައިވާ ކަމަށް ވެސް އޭނާ ވިދާޅުވި އެވެ.

ޒަހީން ވިދާޅުވި ގޮތުގައި އެ މަސައްކަތުގެ ތެރެއިން ކޮމިޝަނުން އެންމެ ފުރަތަމަ ފަށާނީ ކްރިމިނަލް ކޯޓުގައި ހުރި މައްސަލަތައް ލަސްވާ ސަބަބު ހޯދުމުގެ މަސައްކަތެވެ.

ޖޭއެސްސީން މިއަދު ވަނީ އެކަން ބެލުމަށް ޚާއްސަ ކޮމެޓީއެއް ވެސް އެކުލަވާލައިފަ އެވެ.

އެ ކޮމެޓީގައި ތިއްބަވަނީ ހައި ކޯޓުގެ ފަނޑިޔާރުންގެ ތެރެއިން ޖޭއެސްސީގައި އިންނަވާ މެމްބަރު އަބްދުއްރައޫފް އިބްރާހިމާއި ރައީސްގެ މެމްބަރެއްގެ ގޮތުގައި ޖޭއެސްސީގައި އިންނަވާ މަސްތޫރު ހުސްނީ އާއި ރައްޔިތުންގެ މަޖިލީހުގެ މެމްބަރުންގެ ތެރެއިން ހިސާން ހުސައިން އެވެ.