ތިލަފުށީގައި ކެމިކަލް ގުދަންތައް ހެދުމުގެ މަސައްކަތް އެސްޖޭ ކޮންސްޓްރަކްޝަނާ ހަވާލުކޮށްފި

ތިލަފުށީގައި ކެމިކަލް ގުދަން ހެދުމުގެ މަސައްކަތް 9.5 މިލިއަން ރުފިޔާ އަށް އެސްޖޭ ކޮންސްޓްރަކްޝަން ކުންފުންޏާ، ގްރޭޓާ މާލޭ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑް) އިން މިދިޔަ ހަފުތާގައި ހަވާލުކޮށްފި އެވެ.

އެސްޖޭ ކޮންސްޓްރަކްޝަންގެ ޑިރެކްޓަރު ޝިހާދު އިބްރާހިމް މިއަދު ވިދާޅުވީ، މަސް ދުވަހުގެ ތެރޭގައި ގުދަންތައް ހަދައި ނިންމަން، އެ ކުންފުންޏާ ހަވާލުކުރީ މިދިޔަ ބުދަ ދުވަހު ކަމަށެވެ. އެއާ އެކު، މިދިޔަ ބުރާސްފަތި ދުވަހު އަމަލީ މަސައްކަތް ފަށާފައިވާ ކަމަށް އޭނާ ވިދާޅުވި އެވެ. މިހާރު ކުރަމުން އަންނަނީ ކޮންޓްރީޓް އެޅުމުގެ މަސައްކަތެވެ.

އެއް ލައްކަ އަކަފޫޓުގެ ބޮޑު ބިމެއްގައި ގުދަންތައް ހަދަނީ، ޝިހާދު ވިދާޅުވި ގޮތުގައި، ބޮޑު އެއް އިމާރާތުގެ ގޮތުގަ އެވެ. ގުދަންތައް ވަކިކުރަނީ ކާގޯ ކޮންޓެއިނަރު ބަހައްޓައިގެން ކަމަށާއި އެ ކޮންޓެއިނަރުތައް ގެންނަނީ ސަރުކާރުން ކަމަށް އޭނާ ވިދާޅުވި އެވެ.

އެފަދަ 16 ކޮންޓެއިނަރެއް ބަހައްޓާނެ ކަމަށް ޝާހިދު ވިދާޅުވި އެވެ.

"މަސައްކަތް ނިންމަން ހަވާލުކުރި މުއްދަތުގެ ތެރޭގައި ނިންމާނަން،" ޝިހާދު ވިދާޅުވި އެވެ.

މާލޭގައި ހުރި ކެމިކަލް ގުދަންތައް ތިލަފުށްޓަށް ބަދަލުކުރުން އަވަސްކުރަން ސަރުކާރުން ނިންމީ ހ. ތިލަފުށީގޭގައި ހުުރި ގުދަނެއްގައި ރޯވެ މިދިޔަ މަހު ހިނގި ބޮޑު އަލިފާނުގެ ހާދިސާއާ ގުޅިގެންނެވެ. އެ ހާދިސާގައި އެތައް ގެއެއް އަނދައި އެކަކު މަރުވެ، 400 އެއްހާ މީހުންގެ ގެދޮރު ގެއްލުނެވެ.

ގްރޭޓާ މާލެ އިންޑަސްޓްރިއަލް ޒޯން ކުންފުނިން އެ މަސައްކަތް ހަވާލުކުރަން އެންމެ ފުރަތަމަ ނިންމީ އިއުލާން ކުރުމެއް ނެތި އެވެ. ނަމަވެސް ގިނަ ބައެއްގެ ފާޑުކިޔުންތަކާއެކު އެންމެ ފަހުން ވަނީ ގުދަންތައް ހަދައިދޭނެ ބަޔަކު ހޯދަން އާއްމުކޮށް އިއުލާން ކޮށްފަ އެވެ.

އެ ކުންފުނީގެ މެނޭޖިން ޑިރެކްޓަރު އިބްރާހީމް ރަޝީދު "މިހާރު" އަށް ކުރިން ވިދާޅުވީ، ގުދަންތައް ހެދުމަށް 19 ފަރާތަކުން ޝައުގުވެރިކަން ފާޅުކޮށްފައިވާ ކަމަށެވެ. ބިޑް ހުށަހެޅި ކުންފުނިތަކުގެ ތެރޭގައި އަމިން ކޮންސްޓްރަކްޝަނާއި ލިޓަސް މޯލްޑިވްސް ހިމެނެ އެވެ.

އެސްޖޭ ކޮންސްޓްރަކްޝަން ކުންފުންޏަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް ބައެއް މަޝްރޫއުތައް ހިންގި ބައެކެވެ. އޭގެ ތެރެއިން އެއް މަސައްކަތަކީ ޒިކްރާ މިސްކިތެވެ.

ޖުލައި، 9، 2018 ގައި ޒިކްރާ މިސްކިތް ހެދުމުގެ އެއްބަސްވުމުގައި ސޮއިކޮށް އެތައް މަހެއް ވީއިރު ވެސް މަސައްކަތް ނުފެށޭތީ، މި ސަރުކާރުން ވަނީ އެ އެއްބަސްވުން ބާތިލްކޮށްފަ އެވެ. އެއާ އެކު ގެއްލުމުގެ ބަދަލުގެ ގޮތުގައި 141 މިލިއަން ރުފިޔާ ހޯދަން އެ ކުންފުނިން ވަނީ ދައުވާ ކޮށްފަ އެވެ. އެ މައްސަލަ މިހާރު އޮތީ ސިވިލް ކޯޓުގަ އެވެ.