ދެ ކެންޑިޑޭޓުންގެ ސަމާލުކަން ވެސް ފްލޮރިޑާ އަށް

ފްލޮރިޑާ (އޮކްޓޯބަރު 30) - ރިޕަބްލިކަން ކެންޑިޑޭޓް އަދި ރައީސް ޑޮނަލްޑް ޓްރަމްޕާއި ޑިމޮކްރެޓިކް ކެންޑިޑޭޓް ޖޯ ބައިޑަންގެ ކެމްޕޭނުގައި ފްލޮރިޑާ އަށް ޚާއްސަ ސަމާލުކަމެއް ދެއްވަން ފައްޓަވައިފި އެވެ.

ފްލޮރިޑާގައި ކެމްޕޭން ކުރައްވަމުން ބައިޑަން ވިދާޅުވީ ބާރު އޮތީ ފްލޮރިޑާގައި ކަމަށެވެ.

"ތިޔަބޭފުޅުންގެ ވޯޓް ނޫ ކުލައަށް (ޑިމޮކްރެޓިކް ޕާޓީއަށް) ދެއްވައިފި ނަމަ މިކަން އެ ނިމުނީ،" ބައިޑަން ވިދާޅުވި އެވެ.

ފްލޮރިޑާގައި ޓްރަމްޕް ވިދާޅުވީ ބައިޑަން އުޅުއްވަނީ އެމެރިކާ ލޮކްޑައުން ކުރަން ކަމަށެވެ.

އިންތިޚާބުގައި ވޯޓުލާން ފަސް ދުވަހަށްވެފައިވާ އިރު ޚިޔާލު ހޯދުމުގެ ވޯޓުތަކުން ކުރީގައި އުޅޭ ކަމަށް ދައްކަނީ ބައިޑަން އެވެ. ނަމަވެސް ވާދަވެރި ސްޓޭޓްތަކުގެ ތެރޭގައި ހިމެނޭ ފްލޮރިޑާގައި ބައިޑަންގެ ލީޑް ހަންޏެވެ. ވައިޓް ހައުސް އަށް ވަޑައިގަންނަވާ ކެންޑިޑޭޓަކަށް ފްލޮރިޑާ އަކީ ކޮންމެހެން ކާމިޔާބު ކުރަން ޖެހޭ ސްޓޭޓެކެވެ. ޚިޔާލު ހޯދުންތަކުން ދައްކަނީ 29 އިލެކްޓޯރަލް ކޮލެޖް ވޯޓު ހިމެނޭ ފްލޮރިޑާގައި ބައިޑަން އަށް ވުރެ 1.4 ޕޮއިންޓް ފަހަތުގައި ޓްރަމްޕް އުޅުއްވާ ކަމަށެވެ.

އެމެރިކާގެ އިންތިޚާބުގައި މިހާތަނަށް ވަނީ އާލީ ވޯޓިންގެ ގޮތުގައި 80 މިލިއަން މީހުން ވޯޓުލައިފަ އެވެ. މީގެތެރޭން 52 މިލިއަން މީހުން ވޯޓުލާފައި ވަނީ ޕޯސްޓުންނެވެ.

އެންމެ ފަހުން 2016 ވަނަ އަހަރު ބޭއްވި އިންތިޚާބުގައި ޓްރަމްޕް ވަނީ ހިލަރީ ކްލިންޓަންގެ މައްޗަަށް ފްލޮރިޑާގައި ކާމިޔާބު ހޯއްދަވައިފަ އެވެ. ނަމަވެސް އެންބީސީ ނިއުސްގެ ޚިޔާލު ހޯދުންތަކުން ދައްކާ ގޮތުން ފްލޮރިޑާގައި ކަޅު ނަސްލުގެ މީހުންނާއި އަންހެނުން، ވަކި ޕާޓީއަކަށް ތާއީދު ނުކުރާ މީހުން އަދި އުމުރުން ދުވަސްވީ މީހުންގެ ވެސް ތާއީދު ބޮޑީ ބައިޑަން އަށެވެ.

ދެވަނަ ދައުރެއް ކާމިޔާބު ކުރައްވަން ބޭނުން ނަމަ ޓްރަމްޕަށް ފްލޮރިޑާގެ ވޯޓު ކާމިޔާބު ކުރައްވަން ޖެހެ އެވެ.

އެމެރިކާގައި 2000 ވަނަ އަހަރު ބޭއްވި ރިޔާސީ އިންތިޚާބުގައި ކުރީގެ ނައިބް ރައީސް އަލް ގޯގެ މައްޗަށް ޖޯޖް ޑަބްލިއު. ބުޝް ކާމިޔާބު ހޯއްދަވައި ރައީސް ކަމަށް ވަޑައިގެންނެވުނީ ފްލޮރިޑާގެ ނަތީޖާ އެންމެ 537 ވޯޓުން ކާމިޔާބުކުރައްވައިގެންނެވެ. އެ ފަހަރުގެ އިންތިޚާބުގައި ފްލޮރިޑާގެ ވޯޓާ މެދު ގޮތެއް ނުނިމޭތީ އިންތިޚާބުގެ ނަތީޖާ ސާފުވާން މަހެއްހާ ދުވަސް ނެގި އެވެ.