ރާއްޖެ އައުމުން ރަކުލް "ވޯޓާ ބޭބީއަކަށް"

ރާއްޖެ އަށް މިއަދު ޗުއްޓީ އަށް އައިސް އިންޑިިއާގެ ބަތަލާ ރަކުލް ޕްރީތު ސިންގް އޭނާ "ވޯޓާ ބޭބީއެއް" ގެ ގޮތުގައި ސިފަކޮށްފި އެވެ.

ރަކުލް އާއިލާއާ އެކު މިއަދު ހަވީރުގެ ވަގުތެއްގައި ރާއްޖެ އައިސް ޗުއްޓީ ހޭދަކުރަނީ ލަކްސް ސައުތު އަރި އެޓޯލް ރިސޯޓް އެންޑް ވިލާގަ އެވެ. އުމުރުން 30 އަހަރުގެ ބަތަލާއާ އެކު އޭނާގެ މަންމަ އާއި ބައްޕަގެ އިތުރުން ބޭބެ ވެސް އައިސްފައިވެ އެވެ. ރަކުލް ވަނީ ރިސޯޓްގައި ނަގާފައިވާ ފޮޓޯތަކެއް އިންސްޓަގްރާމާއި ފޭސްބުކްގައި ވެސް ހިއްސާކޮށްފަ އެވެ.

އިންސްޓަގްރާމްގައި އާންމުކުރި ފޮޓޯގައި، ވިދަމުން އަންނަ ޒުވާން ބަތަލާ ބުނީ "މޫދާއި ނޫ އުޑުގެ އިހުސާސާ އެކު ޖިސްމު ބޭނުން ވަނީ އުދުހިލަން" ކަމަށެވެ.

ދެހާސް ސާދައިގައި ފިލްމު "ޔާރިޔާން" އިން ބޮލީވުޑަށް ނުކުތް ރަކުލް އެންމެ ފަހުން ފެނިފައިވާ ހިންދީ ފިލްމަކީ މިދިޔަ އަހަރުގެ "މަރުޖާވާ" އެވެ. އޭނާގެ ކުރިއަށް ހުރި ފިލްމުތަކުގެ ތެރޭގައި އަރުޖުން ކަޕޫރާ އެކު ކުޅޭ ފިލްމަކާއި ޖޯން އަބްރަހަމްގެ "އެޓޭކް" އާއި އަޖޭ ދޭވްގަނާ އެކު ކުޅޭ "ތޭންކް ގޯޑް" ގެ އިތުރުން އަޖޭގެ "މޭޑޭ" ހިމެނެ އެވެ.

ރަކުލް އަކީ އިންޑިއާގެ ދެކުނު ފިލްމު އިންޑަސްޓްރީގެ ވެސް ވަރަށް މަޝްހޫރު ބަތަލާއެކެވެ. އޭނާގެ ކުރިއަށް އޮތް ސައުތުގެ އެންމެ ބޮޑު ފިލްމަކީ ކަމަލް ހަސަނާ އެކު ކުޅެފައިވާ "އިންޑިއަން 2" ހިމެނެ އެވެ. އެ ފިލްމުގެ ކާސްޓްގައި ދާދި ފަހުން ހަނީމޫން ޗުއްޓީ ރާއްޖޭގައި ހޭދަކުރި ބަތަލާ ކާޖަލް އަގަރްވާލް ވެސް ހިމެނެ އެވެ.

ރަކުލް ކުޅުނު ހިންދީ ފިލްމުތަކުގެ ތެރޭގައި "ދޭ ދޭ ޕިޔާރު ދޭ" އާއި "ޝިމްލާ މިރްޗް" އަދި "އައްޔާރީ" ހިމެނެ އެވެ.

ރަކުލްގެ ވާހަކަ މި ފަހުން މީޑިއާތަކުގައި އެންމެ ބޮޑަށް ދެކެވުނީ ޖޫން މަހު ދަންޖެހިގެން މަރުވި އެކްޓަރު ސުޝާންތު ރާޖްޕުތުގެ މައްސަލައާ އެކު ބޮލީވުޑްގައި ފެންމަތި މަސްތުވާތަކެތީގެ މައްސަލަގަނޑުގެ ތެރެއިންނެވެ. ނަމަވެސް އެ މައްސަލާގައި ދީޕިކާ ޕަދްކޯނާއި ސާރާ އަލީ ޚާނާއި ޝްރަދާ ކަޕޫރް ފަދަ ބަތަލާއިން ނާކޮޓިކްސް ކޮންޓްރޯލް (އެންސީބީ) އަށް ހާޒިރުކޮށް ސުވާލުކުރި ނަމަވެސް ރަކުލްއާ ސުވާލުކޮށްފައެއް ނުވެ އެވެ.