މުހިންމީ ބަލި ޖެހުނުތަން، ސްކޫލުތަކުގައި މައްސަލައެއް ނެތް: އެޑިއުކޭޝަން

ހަރުދަނާ ފިޔަވަޅުތަކާ އެކު ސްކޫލުތަކަކީ ދަރިވަރުންނަށް ރައްކާތެރި މާހައުލެއް ކަމަށާއި ސްކޫލާ ގުޅުންހުރި ބަޔަކު ކޮވިޑް-19 އަށް ޕޮޒިޓިވްވިއަސް މުހިއްމީ ބަލި ފެތުރުނު ތަން ކަމަށް، އެޑިއުކޭޝަން މިނިސްޓްރީން ރޭ ބުނެފި އެވެ.

އެ މިނިސްޓްރީގެ ޑެޕިއުޓީ މިނިސްޓަރު އަހުމަދު މުޖާހިދު "މިހާރު" އަށް ވިދާޅުވީ، ރާއްޖެއިން ކޮންމެ ދުވަހަކު ވެސް ބަޔަކު ކޮވިޑަށް ޕޮޒިޓިވްވާއިރު އެ މީހުންނަކީ ކޮންމެ ވެސް ތަނެއްގައި މަސައްކަތްކުރާ ބައެއް ކަމަށެވެ. އެގޮތަށް ޓީޗަރުންނާއި ދަރިވަރުން ވެސް ހިމެނޭނެ ކަމަށް ވިދާޅުވި އެވެ.

މުޖާހިދު އެހެން ވިދާޅުވިއިރު، މާލެ ސަރަހައްދުގެ ހަތަރު ސްކޫލެއްގެ ޓީޗަރުންނާއި ދަރިވަރުންތަކެއް ކޮވިޑަށް ޕޮޒިޓިވްވެފައި ވެ އެވެ. އަމީނިއްޔާ ސްކޫލުގެ ޓީޗަރަކު ކޮވިޑަށް ޕޮޒިޓިވްވެ އިތުރު ޓީޗަރުންތަކެއް ކަރަންޓީންކޮށްފައިވާއިރު ޖަމާލުއްދީން ސްކޫލުގެ ދަރިވަރަކާއި ގާޒީ ސްކޫލުގެ ޓީޗަރަކާއި ބިލަބޮންގް އިންޓަނޭޝަނަލް ހައި ސްކޫލުގެ ހަތަރު ދަރިވަރަކު ކޮވިޑަށް ޕޮޒިޓިވްވެފައި ވެ އެވެ.

މުޖާހިދު ވިދާޅުވީ ޓީޗަރަކު އަދި ދަރިވަރަކު ޕޮޒިޓިވްވިއަސް އެކަމާ ގުޅޭގޮތުން އަޅަންޖެހޭ ފިޔަވަޅުތައް އަޅާނެ ކަމަށެވެ. ކުދިންގެ ރައްކާތެރިކަން ކަށަވަރުކުރަން އެޑިއުކޭޝަން މިނިސްޓްރީން ހުރިހާ ކަމެއް ވެސް ކުރާނެ ކަމަށާއި އަދި މިހާރަށް ވުރެ ރަނގަޅަށް މިނިސްޓްރީގެ ޕޮލިސީތަކާއި އުސޫލުތަކާއި ގައިޑްލައިނާ އެއްގޮތަށް އަމަލުކުރާނެ ކަމަށް ވިދާޅުވި އެވެ.

ބަލިން ރައްކާތެރިވުމަށް އަޅާފައިވާ ފިޔަވަޅުތަކާ އެކު، ދަރިވަރުންނާއި ޓީޗަރުން ސްކޫލަށް ވައްދަނީ ހުން ބަލައި އަތް ސެނެޓައިޒްކުރުމަށް ފަހު އެވެ. ކްލާސް ރޫމުގައި ދަރިވަރުން ތިބެނީ ވެސް ތިން ފޫޓު ދުރުގަ އެވެ. މުޖާހިދު ވިދާޅުވީ ބަލީގެ އަލާމާތްތައް ހުރިނަމަ ކްލާސްރޫމަށް ނުވައްދާނެ ކަމަށެވެ. އައިސޮލޭޝަން ރޫމުގައި މަޑުކޮށްފައި ނުވަތަ އެކަމާ ގުޅިގެން ވަގުތުން ފިޔަވަޅު އަޅާނެ ކަމަށް ވިދާޅުވި އެވެ.

"ޕޭރެންޓުންނަށް ދަންނަވާލަން ބޭނުންވަނީ ސްކޫލުތައް، ދަރިވަރުންގެ ރައްކާތެރިކަން ކަށަވަރުކޮށްފައޭ ސްކޫލުތައް ހުޅުވިފައި އެ ހުރީ. މިސާލަކަށް ޕޮޒިޓިވް ކޭސް އެއް ފެނިއްޖެއްޔާ ވެސް އަމަލުކުރަމުން މި ދަނީ އެޗްޕީއޭއިން އަންގާފައިވާ ގޮތެއްގެ މަތިން ނޫނީ އެޗްޕީއޭގެ ގައިޑްލައިނާ އެއްގޮތަށް،" މުޖާހިދު ވިދާޅުވި އެވެ.

"ސްކޫލުތަކަކީ ރައްކާތެރި މާހައުލެއްކަން މިނިސްޓްރީ އޮފް އެޑިއުކޭޝަނުން، ސްކޫލުތަކުން ކަށަވަރުކުރާނެއޭ. އެންމެ އިސްކަންދޭ ކަމަކީ ދަރިވަރުންގެ ރައްކާތެރިކަމޭ. އެހެންވީމަ، ސްކޫލުތަކަށް ކުދިން ފޮނުއްވައިދެއްވާށޭ. އަޅުގަނޑުމެން މަސައްކަތްކުރަމުން މި ދަނީ މި ކަމުގައި ކަމާ ގުޅުންހުރި ފަރާތްތަކާއި އެޗްޕީއޭއާ، މި ހުރިހާ ފަރާތެއްގެ މަޝްވަރާއާ އެކީގައި ދަރިވަރުންނަށް ރައްކާތެރިކަން ހޯދައިދިނުން އެއީ އެންމެ މުހިއްމު ކަމުގެ ގޮތުގައި ބަލައިގެންނޭ."

ކޮންޓެކްޓް ޓްރޭސިންނަށް ސްކޫލު ބަންދުކޮށް އެ މަސައްކަތް ނިމުމުން އަނެއްކާ ވެސް ކިޔަވައިދޭން ފަށަ އެވެ. ފުރަތަމަ ޓާމަށް މިދިޔަ ޑިސެމްބަރު ތިނެއްގައި ސްކޫލު ބަންދުކުރިއިރު ވެސް ސްކޫލު ތެރެއިން ބަލި ފެތުރިފައިނުވެ އެވެ.

"ރާއްޖޭގެ އާބާދީގެ ބޮޑު ނިސްބަތަކީ ދަރިވަރުންނަށް ވާއިރު، ޓީޗަރުންގެ ގޮތުގައި 8،000 އަށްވުރެ ގިނަ ޓީޗަރުން ތިބިއިރު ކޮވިޑަށް ޕޮޒިޓިވްވާއިރު ދަރިވަރަކު އަދި ޓީޗަރަކު ވެސް ހިމެނިދާނެ. އޭގައި ބަލަންޖެހެނީ ވަޒީފާގެ ނަމަކަށް ނޫނީ ދަރިވަރަކަށް ނޫން. [ކޮވިޑް] ފެތުރިފައި އިނީ ކޮންތާކުންތޯ،" މުޖާހިދު ވިދާޅުވި އެވެ.

މިނިސްޓްރީން ބުނީ ލުއިތައް ދިނުމާއެކު ދަރިވަރުން ހަމައެކަނި ދަނީ ސްކޫލަށް ނޫން ކަމަށެވެ. ކިޔެވުން ނިންމައި ބެލެނިވެރިންނާއެކު ބޭރަށްދާކަމަށާއި މާލޭގެ މަގުތަކާއި އާޓިފިޝަލް ބީޗާއި ޕާކުތަކާ އަޅާބަލާއިރު ސްކޫލުގައި އަޅާފައި ހުރި ރައްކާތެރިކަމުގެ ފިޔަވަޅު އަޅާފައި ހުރި ވަރު ރަނގަޅުކަން އެނގޭނެ ކަމަށް ވިދާޅުވި އެވެ.

"ސްކޫލުތަކަށް އިތުބާރުކޮށްދެއްވާށޭ. އެއީ ރައްކާތެރި ތަނެކޭ،" މުޖާހިދު ވިދާޅުވި އެވެ.