މަހަކަށް ވުރެ ގިނަ ދުވަހަށް ފަހު މާލެ ސަރަހައްދުގެ ދަރިވަރުން ސްކޫލަށް

ކޮވިޑް-19އާ ގުޅިގެން އަޅާފައިވާ ފިޔަވަޅުތަކުގެ ސަބަބުން ސްކޫލަށް ނުގޮސް ގޭގައި ތިބޭތާ މަހަކަށް ވުރެ ގިނަ ދުވަސް ފަހުން މާލެ ސަރަހައްދުގެ ހުރިހާ ގްރޭޑެއްގެ ދަރިވަރުން މިއަދު އަލުން ސްކޫލަށް ދާން ފަށައިފި އެވެ.

މާލެ، ހުޅުމާލެ އަދި ވިލިމާލޭގައި ގްރޭޑު 6 އިން ފެށިގެން ދަށް ގްރޭޑުތަކަށް ސްކޫލް ބަންދުކުރީ މިދިޔަ ފެބްރުއަރީ 12 ގަ އެވެ. އޭރު ސްކޫލަށް ނެރެގެން ހުރިހާ ދަރިވަރުންނަށް ކިޔަވައިދޭން ފެށިތާ ވީ އެންމެ މަހެކެވެ.

ސްކޫލުތައް ބަންދުކުރި ދުވަހުން ފެށިގެން މިހާތަނަށް އެ ދަރިވަރުންނަށް ކިޔަވައިދެމުން ދިޔައީ އޮންލައިންކޮށެވެ. އެ މުއްދަތުގައި ގްރޭޑު 8 އިން ފެށިގެން ދަށުގެ ދަރިވަރުންނަށް ވެސް ދެ ހަފުތާއަށް އޮންލައިންކޮށް ކިޔަވައިދިނެވެ. ނަމަވެސް ފަހުން ގްރޭޑް ހަތަކާއި އަށެއްގެ ދަރިވަރުން ވެސް ސްކޫލަށް ގެންދަން ފެށި އެވެ.

މާލެ ސަރަހައްދުގެ އެލްކޭޖީ އިން ފެށިގެން މަތީ ގްރޭޑުތަކަށް މިއަދުން ފެށިގެން އަލުން ސްކޫލަށް ގެންގޮސްގެން ކިޔަވައިދެނީ ކޮވިޑުން ރައްކާތެރިވާން އެކުލަވާލާފައިވާ ނިއު ނޯމަލްގެ އުސޫލަށެވެ.

ދަރިވަރުން ސްކޫލަށް ވައްދާއިރު ހުން ބަލައި އަތް ސެނެޓައިޒްކުރެ އެވެ. އަދި ދަރިވަރުން ކްލާހުގައި ތިބެނީ ގައިދުރުކަން ބަހައްޓައިގެންނެވެ. ކްލާހެއްގައި ފަހަރަކު ތިބެވޭނީ ވެސް ވަކި އަދަދަކަށެވެ.

ސްކޫލުތައް ހުޅުވައިގެން މިއަދު ކިޔަވައިދޭން ނިންމިއަސް، އެ ގޮތަށް ކިޔެވުން ކުރިއަށް ގެންދިއުމުގެ އިހުތިޔާރު ދީފައިވަނީ އެ ސްކޫލަކަށެވެ. އެހެންވެ، ބައެއް ސްކޫލުތަކުގައި ބައެއް ގްރޭޑުތަކަށް މިއަދު ކިޔަވައިދޭން ފެށިއިރު އަނެއް ބައި ސްކޫލުތަކަށް ދަރިވަރުން ގެންދާނީ އަންނަ އާދިއްތަ ދުވަހެވެ.

މިދިޔަ އަހަރުގެ މާޗު 12 ގައި ސްކޫލުތައް ބަންދުކުރި ގޮތަށް ގްރޭޑް 6 އިން ދަށުގެ ދަރިވަރުންނަށް މިދިޔަ އަހަރު ސްކޫލަށް ގެންގޮސްގެން ކިޔަވައިދީފައެއް ނުވެ އެވެ. އެހެންވެ، މިދިޔަ ޖެނުއަރީ 10 ގައި އަލުން ސްކޫލުތައް ހުޅުވުމަކީ، ދަށް ގްރޭޑުތަކުގެ ދަރިވަރުންނާއި ޓީޗަރުން ގާތްގަނޑަކަށް އަހަރެއް ފަހުން ބައްދަލުވި ފުރަތަމަ ދުވަހެވެ.