އޮންލައިންކޮށް ކިޔަވައި ދިނުން އެއް ހަފުތާއަށް އިތުރުކޮށްފި

މާލެ ސަރަހައްދުގެ ސްކޫލްތަކުގައި އެލްކޭޖީން ފެށިގެން ގްރޭޑް 6 އާ ހަމައަށް އޮންލައިންކޮށް ކިޔަވައިދޭން ނިންމާފައިވާ ނިންމުން އިތުރު އެއް ހަފުތާއަށް ދަންމައިފި އެވެ.

ކޮވިޑް-19 ގެ ހާލަތު ރާއްޖޭގައި ގޯސްވާން ފެށުމުން ސްކޫލްތަކުގެ ކިޔަވައި ދިނުން އޮންލައިންކޮށް ކުރިއަށް ގެންދަން އަލުން ވަނީ ފަށައިފަ އެވެ. އެގޮތުން މި މަހުން ފެށިގެން ގްރޭޑް 7 އިން ދަށުގެ ގްރޭޑްތަކުގެ ދަރިވަރުންނަށް އޮންލައިންކޮޮށް ކިޔަވައިދޭން އޮތީ އަންގައިފަ އެވެ. އެ ފިޔަވަޅު އެޅީ ހަފުތާއަކަށެވެ.

އެޑިއުކޭޝަން މިނިސްޓްރީން މިރޭ ބުނީ ކުރިއަށް އޮތް ހަފުތާގައި ވެސް މާލެ ސަރަހައްދުގައި ގްރޭޑް 6 އިން ފެށިގެން ދަށުގެ ހުރިހާ ގްރޭޑްތަކުގެ ކިޔެވުން އޮންލައިންކޮށް ކުރިއަށް ގެެންދަން ނިންމާފައިވާ ކަމަަށެވެ. އަދި ގްރޭޑް 7 އިން ފެށިގެން މަތީގެ ގްރޭޑްތަކުގެ ކިޔެވުން ކުރިއެކޭ ވެސް އެއްގޮތަށް ކުރިއަށް ގެންދާނީ ދަރިވަރުން ސްކޫލަށް ގެންގޮސްގެން ކަމަށް އެ މިނިސްޓްރީން ބުންޏެވެ.

ކޮވިޑް-19 ގެ ހާލަތު އަނެއްކާވެސް ރާއްޖޭގައި ގޯސްވާން ފެށުމުން ރައްކާތެރިކަމުގެ ފިޔަވަޅުތައް ދަނީ ވަރުގަދަ ކުރަމުންނެވެ.