އިންތިޚާބަށް ފަސް ލައްކައެއްހާ ވޯޓު ކަރުދާސް؛ ޗާޕުކުރީ ނޮވެލްޓީން

އަންނަ ހޮނިހިރު ދުވަހު ބާއްވާ އިންތިޚާބަށް ނޮވެލްޓީއާ ހަވާލުކޮށްގެން ފަސް ލައްކައެއްހާ ވޯޓު ކަރުދާސް ޗާޕުކޮށްފައިވާ ކަމަށް އިލެކްޝަންސް ކޮމިޝަން (އީސީ) އިން ރޭ ބުނެފި އެވެ.

އެ ކޮމިޝަނުން ކުރި އިއުލާނުގައި ބުނީ ލޯކަލް ކައުންސިލް އިންތިހާބަށް 275،860 ވޯޓު ކަރުދާސް ޗާޕުކޮށްފައިވާ ކަމަށެވެ. އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް 222،324 ވޯޓު ކަރުދާސް ޗާޕުކޮށްފައި ވެ އެވެ. އެއީ ޖުމްލަ 498،184 ވޯޓު ކަރުދާހެވެ. އާއްމު އިންތިޚާބާ ބެހޭ ގާނޫނުގައި ބުނާގޮތުގައި، ކޮންމެ އިންތިހާބެއް ބޭއްވުމުގެ ގިނަ ވެގެން ފަސް ދުވަސް ކުރިން އެ އިންތިހާބަކަށް ޗާޕްކުރެވުނު ވޯޓު ކަރުދާހުގެ އަދަދާއި ޗާޕުކުރި ތަނުގެ މައުލޫމާތު އާއްމުކޮށް އިއުލާންކުރަންޖެހެ އެވެ.

މިހާރު ވަނީ ވޯޓު ފޮށި ބަހައްޓާ ބޭރު ގައުމުތަކާއި ރިސޯޓްތަކާއި ރަށްރަށަށް ވެސް ވޯޓު ކަރުދާސް ފޮނުވައި ނިންމައިފަ އެވެ.

އިންތިހާބުގައި ވާދަކުރާ މީހުންގެ ނަން އަނބުރާ ގެންދިއުމަށް ހުޅުވާލި ފުރުސަތުގައި 308 ކެންޑިޑޭޓަކު ނަން އަނބުރާ ގެންދިޔަ އެވެ. އެހެންވެ ލޯކަލް ކައުންސިލާއި އަންހެނުންގެ ކޮމިޓީއަށް ކުރިމަތިލި ކެންޑިޑޭޓުންގެ ތެރެއިން 120 ކެންޑިޑޭޓަކު ވަނީ އިންތިހާބަކާ ނުލައި ހޮވިފަ އެވެ.

އީސީން ބުނީ އިންތިހާބުގައި މިހާރު ވާދަކުރަނީ 3،934 ކެންޑިޑޭޓުން ކަމަށެވެ. އެއީ ކައުންސިލް އިންތިޚާބުގައި ވާދަކުރާ 2،264 މީހަކާއި އަންހެނުންގެ ކޮމިޓީތަކަށް ވާދަކުރާ 1،670 ކެންޑިޑޭޓުންނެވެ.