ބަތަލާ ސްރޭޚާ ހާޓްއެޓޭކެއް ޖެހިގެން މަރުވެއްޖެ

މީގެ 10 ވަރަކަށް މަސް ކުރިން ސްޓްރޯކެއް ޖެހިގެން އެޑްމިޓްކޮށް ފަރުވާދިން ބޮލީވުޑްގެ ދުވަސްވީ ބަތަލާ ސްރޭޚާ ސިކްރީ އަށް ހާޓްއެޓޭކެއް ޖެހިގެން މިއަދު މަރުވެއްޖެ އެވެ.

މީޑިއާތަކުން ބުނި ގޮތުގައި ހިތުގެ ގިނަ މައްސަލަތަކެއް ދިމާވި 75 އަހަރުގެ ބަތަލާ މިއަދު ހެނދުނުގެ ވަހުތެއްގައި މަރުވީ ހާލު ދެރަވެގެން ހޮސްޕިޓަލްގައި އެޑްމިޓްކޮށް ފަރުވާ ދެމުން ދަނިކޮށެވެ.

މިކަމާ ގުޅިގެން އާއިލާ އިން ނެރުނު ބަޔާނެއްގައި ބުނީ ތިން ނެޝަނަލް އެވޯޑް ހޯދި ސްރޭޚާ މަރުވީ އާއިލާގެ މީހުންގެ ގާތުގައި ކަމަށާއި މި ވަގުތަކީ އާއިލާ އަށް ވަރަށް ބޮޑަށް ޕްރައިވެސީ ވެސް ބޭނުންވާ ވަގުތެއް ކަމަށެވެ.

ކާމިޔާބު އެތައް ފިލްމަކާއި ޓީވީ ސިލްސިލާތަކެއް ވެސް ކުޅެފައިވާ ސްރޭޚާ އަކީ 2018 ގައި ރިލީޒްކުރި ފިލްމު "ބަދާއީ ހޯ" ގައި ކުޅުނު ރޯލުން ބެލުންތެރިންގެ ލޯބި ކުރިއަށް ވުރެ ބޮޑަށް ހޯދި ބަތަލާއެކެވެ. ތިން ވަނަ ނެޝަނަލް އެވޯޑް އޭނާ އަށް ލިބުނީ އެ ފިލްމުގައި ކުޅުނު ސަޕޯޓިން ރޯލުންނެވެ.

ސްރޭޚާ ކުޅުނު ޓީވީ ސިލްސިލާތަކުގެ ތެރޭގައި "ބަލިކާ ވަދޫ" އާއި "ސާތު ޕޭރޭ" އާއި "ޕަރްދޭސް ހެ މޭރާ ދިލް" އަދި "ކޭސަރު" ހިމެނެ އެވެ. އޭނާގެ ފާހަގަކޮށްލޭ ބައެއް ފިލްމުތަކުގެ ތެރޭގައި "ޒުބޭދާ" އާއި "ދިއްލަގީ" އާއި "މައްމޯ" އަދި "ސަރުދާރީ ބޭގަމް" ހިމެނެ އެވެ.

ސުޜޭޚާ ންމެ ފަހުން ފެނިފައި ވަނީ މިދިޔަ އަހަރުގެ ކުރީކޮޅު ނެޓްފްލިކްސް އިން ސްޓްރީމްކުރި އެންތޮލޮޖީ ފިލްމު "ގޯސްޓް ސްޓޯރީޒް" އިންނެވެ.