ސަލްމާންގެ "ޓައިގާ 3" ގައި ޝާހްރުކްގެ ފެނިލުމެއް

ޝާހްރުކް ޚާން މިހާރު ކުޅެމުން އަންނަ ފިލްމު "ޕަތާން" ގައި ހިމެނޭ ސަލްމާން ޚާންގެ ހާއްސަ ފެނިލުމުގެ ޝޫޓިން ވެސް ނިންމާލާފައިވާ އިރު، އޭނާގެ "ޓައިގާ 3" ގައި ޝާހްރުކްގެ ހާއްސަ ފެނިލުމެއް ވެސް ހިމަނަން ނިންމައިފި އެވެ.

މި ދެ ފިލްމަކީ ވެސް އަދިތިޔާ ޗޯޕްޅާގެ ޔާޝްރާޖް ފިލްމްސް (ވައިއާރްއެފް) އިން ހަދާ ފިލްމުތަކެވެ. މީޑިއާތަކުން ބުނީ މާޗް މަހުން ފެށިގެން "ޓައިގެ 3" ގެ މަސައްކަތް މެދުކެނޑިފައި އޮތުމަށް ފަހު، އޭގެ މަސައްކަތް އަލުން މި މަހުގެ 23 ގައި ފަށާނެ ކަމަށެވެ. "ޕަތާން" އާއި "ޓައިގާ 3" ވެސް ގެ ޝޫޓިން ވެސް ކުރިއަށް ގެންދަނީ ވައިއާރްއެފްފައި ހަދާފައިވާ ސެޓްތަކެއްގައި ކަމަށްވާތީ ސަލްމާންގެ ފިލްމުގެ ޝޫޓިން އަލުން ފެށުމާ އެކު ޝާހްރުކް، އެ ފިލްމުގެ ސެޓަށް ގޮސް ވެސް ޝޫޓްކުރަން ޖެހޭ "ޓައިގާ 3" ގެ މަންޒަރުތައް ނަގައި ނިންމާނެ އެވެ.

މި ދެ ފިލްމަކީ ވެސް އިންޑިއާގެ ޝޫޓިން ނިންމައިލުމަށް ފަހު، އަންނަ މަހުގެ ތެރޭގައި ކާސްޓާއި ކްރޫ އިންޓަނޭޝަނަލް ލޮކޭޝަންތަކަށް ފުރަން ތާވަލުކޮށްފައި އޮތް ފިލްމުތަކެވެ. އެހެންވެ އޭގެ ކުރިން "ޓައިގާ 3" ގެ މަންޒަރުތައް ޝާހްރުކް ނިންމާނެ އެވެ.

"ޕަތާން" އަކީ ވައިއާރްއެފްގެ 2019 ގެ "ވޯ" ހެދި ސިދާތު އާނަންދު ޑައިރެކްޓްކުރާ އެކްޝަން ތުރިލާއެކެވެ. މީގެ ކާސްޓްގައި ދީޕިކާ ޕަދްކޯނާއި ޖޯން އަބްރަހަމް ވެސް ހިމެނެ އެވެ.

ސަލްމާންގެ "ޓައިގާ" ފްރެންޗައިޒްގެ ތިން ވަނަ ފިލްމަކީ ޝާހްރުކްގެ 2016 ގެ "ފޭން" ގެނެސްދިން މަނީޝް ޝަރުމާ ޑައިރެކްޓްކުރާ ސްޕައި އެކްޝަން ތުރިލާއެކެވެ. މީގެ ކާސްޓްގައި ކެޓްރީނާ ކައިފާއި އިމްރާން ހާޝްމީ ހިމެނެ އެވެ.

"ޕަތާން" އާއި "ޓައިގާ 3" ވެސް ބެލުންތެރިންނަށް ގެނެސްދޭނީ އަންނަ އަހަރު އެވެ.

ކުރިން ވެސް ސަލްމާނާއި ޝާހްރުކް އެކަކު އަނެކެއްގެ ފިލްމުތަކުގެ ހާއްސަ ފެނިލުންތަކުގައި ބައިވެރިވެފައިވެ އެވެ. ދެ ތަރިން އެކީގައި ކުޅުނު ފިލްމުތަކުގެ ތެރޭގައި "ކަރަން އަރުޖުން" އާއި "ކުޗް ކުޗް ހޯތާ ހޭ" އަދި "ހަމް ތުމާރޭ ހޭ ސަނަމް" ހިމެނެ އެވެ.