ކޮވިޑް ކޮންޓްރޯލް ކުރުމުގައި ސައޫދީގެ އެހީ މެލޭޝިޔާއަށް

މެލޭޝިޔާގައި ހަލުވިކަމާ އެކު ފެތުރެމުންދާ ކޮވިޑް-19 ވަބާ ކޮންޓްރޯލް ކުރުމުގައި، އެހީތެރިވެދިނުމަށް ސައޫދީ އަރަބިއްޔާ ސަރުކާރުން ނިންމައިފި އެވެ.

ސައޫދީން މެލޭޝިޔާ އަށް އެހީތެރިވެދިނުމަށް ނިންމީ، މެލޭޝިޔާގެ ހާރިޖީ ވަޒީރު ހުޝާމުއްދީން ހުސައިން އާއި ސައޫދީ ވަލީ އަހުދު މުހައްމަދު ބިން ސަލްމާނާ އެކު، ފޯނުން އިއްޔެ ކުރެއްވި މަޝްވަރާތަކުގައި، މެލޭޝިޔާގެ ހާރިޖީ ވަޒީރު އެކަމަށް އެދިވަޑައިގަތުމުންނެވެ. މެލޭޝިޔާގެ އެދުމަށް އިޖާބަ ދިނުމުގެ ގޮތުން، ރަސްގެފާނު ސަލްމާން މިހާރު ވަނީ، ކިންގް ސަލްމާން ހިޔުމަނިޓޭރިއަން އެއިޑް އެންޑް ރިލީފް ސެންޓަރު މެދުވެރިކަން، މެލޭޝިޔާ އަށް އެހީ ފޯރުކޮށްދިނުމަށް، އެ މަރުކަޒަށް އަންގަވައިފަ އެވެ.

ސައޫދީ އަރަބިއްޔާ ސަރުކާރުން އިއްޔެ ބުނި ގޮތުގައި ކޮވިޑް ކޮންޓްރޯލް ކުރުމަށް ސައޫދީ މެލޭޝިޔާ އަށް ފޮނުވާ އެހީގެ ސާމާނުގެ ތެރޭގައި، ސިއްހީ ހިދުމަތް ދިނުމަށް ބޭނުންކުރާ ތަފާތު އާލާތްތައް ހިމެނެ އެވެ. އޭގެ އިތުރުން ސިއްހީ ހިދުމަތްތެރިން ބޭނުންކުރާ ހާއްސަ ހެދުން ވެސް ސައޫދީން މެލޭޝިޔާ އަށް ފޮނުވާނެ އެވެ. އެހީގެ ސާމާނުގެ ތެރޭގައި ހިމެނޭ އެންމެ މުހިންމު އެއްޗަކީ، ކޮވިޑް ވެކްސިންގެ އެއް މިލިއަން ޑޯޒް އެވެ.

ސައޫދީ ރަސްގެފާނުގެ ރިލީފް ސެންޓަރުގެ ޖެނެރަލް ސުޕަވައިޒަރު ޑރ. އަބްދުﷲ ބިން އަބްދުލްއަޒީޒް އައްރަބީއާ ވިދާޅުވި ގޮތުގައި، މެލޭޝިޔާ އަށް ފޮނުވާ ކޮވިޑް ވެކްސިން ފޮނުވާނީ، ވެކްސިން އުފައްދާ ގައުމެއްގެ ކާރުހާނާއިން ސީދާ މެލޭޝިޔާ އަށެވެ. އަދި މި އެހީގެ ދަށުން މެލޭޝިޔާއަށް ފޮނުވާ ތަކެތި ހޯދުމަށްޓަކައި، އެފަދަ ތަކެތި އުފައްދާ ކުންފުނިތަކާ އެކު އެއްބަސްވުންތައް ގާއިމުކުރުމުގެ މަސައްކަތް ގމިހާރު އަންނަނީ ކުރަމުންނެވެ.

މެލޭޝިޔާގައި ކޮވިޑް ފެތުރެން ފެށިފަހުން، އެ ގައުމުން ކޮވިޑް ޖެހުނު މީހުންގެ އަދަދު އިއްޔެ ވަނީ އެއް މިލިއަނަށް އަރައިފަ އެވެ. އިއްޔެ އެކަނި ވެސް، މެލޭޝިޔާ އިން 17045 މީހަކު އަލަށް މި ބައްޔަށް ޕޮޒިޓިވްވި އެވެ. ކޮވިޑް ބަލީގައި އެ ގައުމުން މަރުވި މީހުންގެ އަދަދު ވެސް މިހާރު ވަނީ 8000 އަށް އަރައިފަ އެވެ.