ނަޝީދަށް ރައްކާތެރިކަން އޮތް ކަަމަށް ވިދާޅުވުމުން ކަންބޮޑުވޭ: ވަކީލުން

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ރާއްޖެއަށް ވަޑައިނުގެންނެވޭނެ ސަބަބެއް ނެތް ކަަމަށް ރައްޔިތުންގެ މަޖިލީހުގެ ދިއްގަރު ދާއިރާގެ އެމްޑީޕީ މެމްބަރު އިކްރާމް ހަސަން ވިދާޅުވުމުން ނަޝީދުގެ ފަރާތުން އެމަނިކުފާނުގެ ވަކީލުން މިއަދު ކަންބޮޑުވުން ފާޅުކުރައްވައިފި އެވެ.

ނަޝީދު އަވަހާރަކޮށްލަން މި އަހަރުގެ މޭ ހަ ވަނަ ދުވަހުގެ ރޭ ދިން ޓެރަރިސްޓް ހަމަލައިގައި ލިބުނު ޒަހަމްތަކަށް އޭޑީކޭ ހޮސްޕިޓަލުން ބޮޑެތި ސާޖަރީތަކެއް ހަދައި، އިތުރު ފަރުވާ ހޯއްދެވުމަށް ވަޑައިގެންނެވީ ޖަރުމަނަށެވެ. ޖަރުމަނުން ފަރުވާ ހޯއްދެވުމަށް ފަހު އެމަނިކުފާނު މިހާރު ވަޑައިގެން ހުންނެވީ އިނގިރޭސި ވިލާތުގަ އެވެ. އާއިލާގެ ބައެއް ބޭފުޅުން ވެސް ދިރިއުޅުއްވާ އިނގިރޭސި ވިލާތަށް ވެސް ނަޝީދު ވަޑައިގަތީ އިތުރު ފަރުވާއަށް ކަމަށް އާއިލާ އިން ބުނެފައި ވެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި އިކްރާމް ވިދާޅުވީ، ޓެރަރިސްޓު ހަމަލާއަށް ފަހު ސަރުކާރުން އަޅާފައިވާ ފިޔަވަޅުތަކާއެކު، ނަޝީދަށް ކުރިއަށް ވުރެ ބޮޑަށް މިހާރު ސެކިއުރިޓީ ލިބިވަޑައިގަންނަވާނެ ކަމަށާއި ސެކިއުރިޓީ ދޭ ވަރު އިތުރު ކުރުމުގެ ފުރުސަތު ވެސް އެބައޮތް ކަމަށެވެ. އެހެންވީމާ އެ މަނިކުފާނު ރާއްޖެ ވަޑައިނުގަނެވިގެން މިއަދު ހުންނަވަން ޖެހޭ ސަބަބެއް ނެތް ކަމަށާއި ކަންކަން ރަނގަޅު ކުރަން ރާއްޖެ ވަޑައިގެން މަސައްކަތްޕުޅު ކުރައްވަން ޖެހޭ ކަމަށް ވެސް އިކްރާމް ވިދާޅުވި އެވެ.

"އަޅުގަނޑު ގަބޫލުކުރާ ގޮތުގައި މިއަދު [ނަޝީދަށް] ނާދެވޭނެ މާހައުލެއް ނެތް. ރައީސް ނަޝީދަށް ވަޑައިގެންނެވޭނެ. ވަޑައިނުގަންނަވަންވީ ސަބަބެއް ނެތް،" އިކްރާމް ވިދާޅުވި އެވެ.

އިކްރާމްގެ އެ ވާހަކައަށް ރައްދުދީ ނަޝީދުގެ ވަކީލުން ނެރުނު ބަޔާނުގައި ބުނީ ކުރިއަށް ވުރެ ބޮޑަށް އެމަނިކުފާނަށް މިހާރު ސެކިއުރިޓީ ލިބިވަޑައިިގެންނެވި ކަމަށް އިކްރާމް ވިދާޅުވި އިރު، އެމަނިކުފާނަށް ދިން ބޮމުގެ ހަމަލާ ރާވައި ، އެކަމަށް ފަންޑުކުރި ފަރާތްތައް އަދި ހައްޔަރުކުރެވިފައި ނުވާ ކަމަށް ފުލުހުން އިއުތިރާފްވެފައިވާ ކަމަށެވެ.

"...ނަޝީދު ރާއްޖެ ވަޑައިގަތުމުގެ މާހައުލު އޮތީ އޮމާންކޮށް ކަމުގައި ދޭހަވާ ގޮތަށް އިކްރާމް ވާހަކަދެއްކެވުމަކީ ނަޝީދުގެ ފުރާނަފުޅަށް މިހާރުވެސް އޮތް ނުރައްކަލުގެ ސީރިއަސްްކަމަށް އެއްވެސް ފަރުވާލެއް ނެތި ދެއްކެވި ޒިންމާދާރުކަން ކުޑަ ވާހައެކެވެ،" ނަޝީދުގެ ވަކީލުން ނެރުނު ބަޔާނުގައި ބުންޏެވެ.

އިކްރާމްގެ ވާހަކައަކީ އޭނާ ތަމްސީލުކުރައްވާ ދާއިރާގެ ރައްޔިތުންގެ ވެސް ތާއީދެއް ނެތް "ވިޔާނުދާ ވާހަކައެއް ކަމަށް ވެސް އެބަޔާނުގައި ބުންޏެވެ.