ނަޝީދު މާދަމާ އޮންލައިންކޮށް ނޫސްވެރިންނާ ބައްދަލު ކުރައްވަނީ

އަވަހާރަކޮށްލަން ދިން ޓެރަރިސްޓް ހަމަލާއަކާ ގުޅިގެން, އިނގިރޭސި ވިލާތުގައި ފަރުވާ ހޯއްދަވަމުން ގެންދަވާ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނޫސްވެރިންގެ ބައްދަލުވުމެއް މާދަމާ ބޭއްވުމަށް ހަމަޖެހިއްޖެ އެވެ.

މިއީ މެއި 6 ގެ ހަމަލާއަށް ފަހު އެމަނިކުފާނު ނޫސްވެރިންގެ ބައްދަލުވުމެއް ބާއްވާ ފުރަތަމަ ފަހަރެވެ. މި ބައްދަލުވުން ކުރިޔަށް ދަނީ މާދަމާ މެންދުރު 12:30 ގައި އޮންލައިން ކޮށެވެ.

ޓެރަރިސްޓް ހަމަލާގައި ވަރަށް ބޮޑަަށް ޒަހަމްވުމުން އޭޑީކޭ ހޮސްޕިޓަލްގައި ފަރުވާ ހޯއްދެވުމަށް ފަހު އިތުރު ފަރުވާ އަށް ނަޝީދު ފުރަތަމަ ވަޑައިގަތީ ޖަރުމަނަށެވެ. އެ ގައުމުގައި ފަރުވާ ހޯއްދެވުމަަށް ފަހު މިހާރު އިނގިރޭސި ވިލާތުގައި ހުންނެވިއިރު، ނަޝީދު އަނބުރާ ރާއްޖެ ވަޑައިގަތުމަށް ޖެހިލުންވެވަޑައިގަންނަވާ ކަމަށް އެމަނިކުފާނު ވިދާޅުވެފައިވެ އެވެ.

ރާއްޖެ ވަޑައިގަތުމުގެ ކުރިން ނަޝީދު އެދިވަޑައިގަންނަވަނީ އެމަނިކުފާނަށް ހަމަލާ ދޭން ފަންޑު ކުރި މީހުންނާއި އެކަން ރޭވި މީހުން ހައްޔަރު ކުރުމަށެވެ.

ނަޝީދަށް ހަމަލާ ދިން މައްސަލާގައި ރައްޔިތުންގެ މަޖިލީހުގެ 241 ކޮމިޓީން ކުރިޔަށް ގެންދިޔަ ރެކޮމެންޑޭޝަންތަކަށް އަމަލު ކުރުމުގެ މަސައްކަތް ސަރުކާރުން އަންނަނީ ކުރަމުންނެވެ. ނަމަވެސް އެކަން އަވަސް މިނެއްގައި ކުރިޔަށް ނުދާ ކަމުގެ ކަންބޮޑުވުން ނަޝީދާ ގާތް އެމްޑީޕީގެ މެންބަރުން އަންނަނީ ފާޅު ކުރަމުންނެވެ.

ހަމަލާގެ އިތުރުން އެމަނިކުފާނު ވަނީ ރާއްޖެއިން ބޭރުގައި ހުންނަވައިގެން ސިޔާސީ ގޮތުން ވެސް ބޮޑެތި ނިންމުންތައް ނިންމަވައިފަ އެވެ. އެގޮތުން ރައީސް އިބްރާހިމް މުހައްމަދު ސޯލިހާއެކު އޮތް ސިޔާސީ ގުޅުން ކަނޑާލައްވައި، އިދިކޮޅު ޕީޕީއެމްގެ ލީޑަރު އަދި ކުރީގެ ރައީސް އަބްދުﷲ ޔާމީންއާއެކު މަސައްކަތް ކުރަން ބޭނުންފުޅުވާ ކަން ވެސް އެމަނިކުފާނު ހާމަކުރެއްވި އެވެ.