ޔާމީންގެ ގެކޮޅު ކައިރީގައި ބަޔަކު ޝައްކު ކުރެވޭ ގޮތަކަށް އުޅޭ މައްސަލައެއް ފުލުސް އޮފީހަށް

ކުރީގެ ރައީސް އަބްދުﷲ ޔާމީންގެ ގެކޮޅު ކައިރީގައި ބަޔަކު ފާރަލާ ކަމަށް ބުނެ އެ މައްސަލަ ބަލައިދިނުމަށް އެދި މިއަދު ފުލުސް އޮފީހަށް ހުށަހަޅައިފި އެވެ.

ހ. ދޫވެހި ކައިރީގައި ބަޔަކު ފާރަލާ މައްސަލަ ފުލުސް އޮފީހަށް ހުށަހެޅުއްވުމަށް ފަހު މީޑިއާއާ ވާހަކަ ދައްކަވަމުން ކުރީގެ ނައިބު ރައީސް އަދި ޔާމީންގެ ވަކީލު ޑރ. މުހައްމަދު ޖަމީލު އަހުމަދު ވިދާޅުވީ ބަޔަކު "ވަރަށް ޝައްކު ކުރެވޭ ގޮތަކަށް" އެ ގެކޮޅު ކައިރީގައި ވީޑިއޯކޮށް، ފޮޓޯ ނަގައި އުޅޭ ކަމަށެވެ.

ޖަމީލް ވިދާޅުވީ، މި މައްސަލައާ ގުޅިގެން ޔާމީންގެ އާއިލާގެ ކަންބޮޑުވުން ވެސް އެބަ އޮތް ކަމަށެވެ.

އެ މަނިކުފާނު ވިދާޅުވީ، އެކަމުގައި ފުލުހުންގެ ފަރާތުން އެއްބާރުލުން ލިބުނު ކަމަށާއި މައްސަލަ ބައްލާނެ ކަމަށް އުންމީދު ކުރައްވާ ކަމަށެވެ.

ޔާމީނަކީ މީގެ ކުރިން ވެސް ހަމަލާއެއް އަމާޒުވި ބޭފުޅެއް ކަން އެ މަނިކުފާނުގެ ވަކީލު އާދަމް ޝަމީމް ފާހަގަ ކުރެއްވި އެވެ. މި އަހަރުގެ ތެރޭގައި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ވެސް ޓެރަރިސްޓު ހަމަލާއެއް ދިންކަން ވެސް އޭނާ ފާހަގަ ކުރެއްވި އެވެ. އަދި ޔާމީންގެ ގެކޮޅު ކައިރީގައި ބަޔަކު ފާރަލާ ކަމަށް ޝައްކު ކުރެވޭ މައްސަލަ ފުލުސް އޮފީހަށް ހުށަހެޅީ ފުލުހުންނަކީ ކުށް ކުރުން ދުރާލައި ހުއްޓުވުމުގެ ޒިންމާ މަތިކޮށްފައިވާ މުއައްސަސާ އަށް ވާތީ ކަމަށް އާދަމް ޝަމީމް ވިދާޅުވި އެވެ.

ގއ. ވޮޑަމުލާ ދޫކޮށްގެން ދައުލަަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރިކަން ޔާމީންގެ މައްޗަށް ސާބިތުވި ފަސް އަހަރުގެ ހުކުމުގެ މައްސަލަ މިހާރު އޮތީ ސުޕްރީމް ކޯޓު މަރުހަލާގަ އެވެ. އެ މައްސަލައިގެ އަޑުއެހުންތަައް ފަށާނީ އަންނަ މަހުގެ 12 ވަނަ ދުވަހު އެވެ.

ޔާމީންގެ މައްޗަށް ފަސް އަހަރުގެ ޖަލު ހުކުމެއް ކޮށްފައި ވިޔަސް އެ މަނިކުފާނު ހުންނެވީ ގޭބަންދަށް ބަދަލުކޮށްފަ އެވެ. ކަރެކްޝަންސް އިން ބުނެފައިވާ ގޮތުގައި ޔާމީން ގެއަށް ބަދަލު ކުރީ ޖަލުގައި ކޮވިޑް ފެތުރޭތީ އެވެ. ކޮވިޑްގެ ހާލަތު މިހާރު އާންމު ހާލަތަށް ބަދަލުވެފައިވީ ނަމަވެސް އެ މަނިކުފާނު ޖަލަށް އަނބުރާ ނުގެންދެ އެވެ.