އެޕަލް ސައިޑަ ވިނިގާ: ފައިދާތައް ގިނަ ބޭނުންތެރި އެއްޗެއް

އެޕަލް ސައިޑަ ވިނިގާގެ ފައިދާތައް ގިނަ އެވެ. އެތައް ކަމަކަށް އެތައް ގޮތަކަށް ބޭނުންކުރެވެ އެވެ. އެހެންވެ އަބަދު ވެސް އަތުޖެހޭ ހިސާބުގައި އެޕަލް ސައިޑަ ވިނިގާ ފުޅިއެއް ބަހައްޓާށެވެ.

އެޕަލް ސައިޑަ ވިނިގާ އިން ލިއްބައިދޭ މުހިއްމު ފަސް ފައިދާއެއްގެ ވާހަކަ މި ކިޔައިދެނީ އެމެރިކާގެ އެރިޒޯނާ ސްޓޭޓް ޔުނިވަސިޓީގެ ކޮލެޖް އޮފް ހެލްތު ސޮލިއުޝަންސްގެ އެސޯސިއޭޓް ޑީން އަދި ތަޖުރިބާކާރު ޑައިޓީޝަން ކެރޯލް ޖޯންސްޓަނެވެ.

1. ލޭގެ ހަކުރު ދަށްކުރުން

ހަކުރުބަލިން ރައްކާތެރިކަން ހޯދަން ބޭނުން ނަމަ ކާނާ ތައްޔާރުކުރާ އިރު، އެޕަލް ސައިޑަ ވިނިގާ ބޭނުން ކުރެވިދާނެ އެވެ. މީގެ ސަބަބުން ލޭގެ ހަކުރުގެ މިންވަރު ދަށްކޮށްދޭން ބާރަކަށްވެ އެވެ. ކެރޯލް ވިދާޅުވި ގޮތުގައި އިންސިއުލިން-ރިސިސަަންޓެއްގެ ގޮތުގައި އެޕަލް ސައިޑަ ވިނިގާ ބޭނުން ކުރުމަކީ ދުރާލައި ހަކުރުބަލިން ދިފާއުވާން ބޭނުން ކުރެވިދާނެ އެއްޗެކެވެ.

2. ބަރުދަން ލުއިކުރުން

ބަރުދަން ލުއިކުރަން މަސައްކަތްކުރާ ނަމަ އެކަމަށް ވެސް އެޕަލް ސައިޑަ ވިނިގާ ބޭނުންކުރެވިދާނެ އެވެ. ދިރާސާތަކުން ދައްކާ ގޮތުގައި ހިކެން މަސައްކަތްކުރާ ނަމަ އެކަން ކުރަން އުނދަގޫ މީހުންގެ ޑައިޓްގައި އެޕަލް ސައިޑަ ވިނިގާ ހިމެނުމުން، ބަރުދަން ލުއިކޮށްދިނުން އަވަސްކޮށްދެ އެވެ. ކާނާ ތައްޔާރުކުރާ އިރު މި ވިނިގާ ބޭނުންކުރުމުން ކެވޭ މިންވަރު ކޮންޓްރޯލްކޮށްދީ، އަވަހަށް ބަނޑުފުރުމުގެ އިިހުސާސްކޮށްދޭނެ އެވެ.

އެހެންވެ ބަރުދަން ލުއިކުރަމް އަމާޒު ހިފާ އިރު ޕޯޝަން ކުޑަކުރުމާއި ކަސްރަތު ވެސް ވަރަށް މުހިއްމު ރޯލެއް ކުޅޭނެ އެވެ.

3. ޕްރެޒަވޭޓިވެއްގެ ގޮތުގައި

އަސާރަ އެޅުމާއި ބައެއް އެއްޗެހި ގިނަ ދުވަހަށް ބެހެއްޓުމަށްޓަކައި ވިނިގާ އަކީ އާންމުކޮށް ބޭނުންކުރާ އެއްޗެކެވެ. އެގޮތުން ސައިޑަ ވިނިގާ އަކީ ވެސް އެގޮތަށް ބޭނުންކުރަން ވަރަށް ރަނގަޅު އެއްޗެކެވެ. އަދި މިއީ ކާނާގެ ރަހަ ވެސް ވަރަށް ބޮޑަށް ރަނގަޅުކޮށްދޭނެ އެއްޗެކެވެ.

އަދި މޭވާ އާއި ތަރުކާރީ ފަދަ އެއްޗެހި ދޮންނަ އިރު، އެކަމަށް އެޕަލް ސައިޑަ ވިނިގާ ބޭނުންކުރުމަކީ ވެސް އެ އެއްޗެހީގެ ތާހިރުކަން ބޮޑުކޮސްދޭނެ ކަމެކެވެ.

4. ހަންގަނޑުގެ ރައްކާތެރި ކަމަށް

މަދިރި އާއި އެ ނޫން ސޫފިތަކުގެ ސަބަބުން ހަންގަނޑު ކަހައި ހިރުވާ ނަމަ އެކަމާ ދެކޮޅަށް އެޕަލް ސައިޑަ ވިނިގާ ބޭނުން ކުރެވުދާނެ އެވެ. މޫނުގައި ބިހި ނަގާ ނަމަ އަދި ސްކިން އިންފެކްޝަނާ ދެކޮޅަށް ވެސް މިއީ ހައްލަކަށް ބޭނުން ކުރެވިދާނެ އެއްޗެކެވެ.

5. ތަންތަން ސާފުކުރަން

އެޕަލް ސައިޑަ ވިނިގާ އަކީ އޭގައި އެކުލެވޭ އެންޓިމައިކްރޯބަލް މާއްދާތަކުގެ ސަބަބުން ގޭތެރެ އާއި އެއްޗެހި ސާފުކުރަން ބޭނުންކުރެވިދާނެ އެއްޗެކެވެ. އެކަމަކު މިފަދަ ކަންކަމަށް އެޕަލް ސައިޑަ ވިނިގާ ބޭނުންކުރާ އިރު ބްލީޗާއި އެމޯނިއާ ފަދަ އެއްޗެއް އެއާ މިކްސްކުރުމަކީ ރައްކާތެރި ގޮތެއް ނޫނެވެ.