ބޮލީވުޑްގެ ޚަބަރުތައް ކުރުކޮށް

ސަލްމާން ޚާނާއި ކެޓްރީނާ ކައިފްގެ ފިލްމު "ޓައިގާ 3" ގެ މަންޒަރުތަކެއް ރަޝިއާގައި ނެގުމަށް ފަހު، ކާސްޓާއި ކްރޫ އޭގެ ޝޫޓިން ތުރުކީގައި ފަށައިފި އެވެ.

އިސްތަންބޫލްގެ ޝޫޓިންގެ ތެރެއިން ގިނަ ފޭނުންތަކެއް ސަލްމާނާ އެކު ނަގާފައިވާ ފޮޓޯތަކެއް އެ މީހުންގެ ސޯޝަލް މީޑިއާގައި ޕޯސްޓްކޮށްފައިވެ އެވެ. "ޓައިގާ 3" ގެ ވިލަންގެ ރޯލު މި ފަހަރު ކުޅޭ އިމްރާން ހާޝިމީ ވެސް މިހާރު ވަނީ އެ ގައުމަށް ގޮސްފަ އެވެ. އޭނާ ވަނީ ފުރުމުގެ ކުރިން މުމްބާއީ އިންޓަނޭޝަނަލް އެއާޕޯޓްގައި ނަގާފައިވާ ފޮޓޯއެއް އިންސްޓަގްރާމްގައި ބުދަ ދުވަހު ޕޯސްޓްކޮށްފަ އެވެ. އޭގެ ކެޕްޝަނަކަށް އިނީ "ކެޗިން އަ ރެޑް އައި ފްލައިޓް ޓު އާރްޓީ" އެވެ.

"ޓައިގާ 3" އަކީ ޔާޝްރާޖް ފިލްމްސް (ވައިއާރްއެފް) އިން ޕްރޮޑިއުސްކޮށް، މަނީޝް ޝަރުމާ ޑައިރެކްޓްކުރާ ފިލްމެކެވެ. މީގެ ފުރަތަމަ ދެ ބަޔަކީ ކަބީރް ޚާން 2012 ގައި ގެނެސްދިން "އޭކް ތަ ޓައިގާ" އާއި އަލީ އައްބާސް ޒަފަރު 2017 ގައި ގެނެސްދިން "ޓައިގާ ޒިންދާ ހޭ" އެވެ.

"ޓައިގާ 3" އަންނަ އަހަރު ގެނެސްދޭނެ އެވެ. އެކަމަކު އަދި ވަކި ތާރީހެއް ނުނިންމަ އެވެ.

ސާއިރާ އައިސީޔޫގައި

ޖުލައި މަހު މަރުވި ބޮލީވުޑްގެ ކުރީގެ މަޝްހޫރު އެކްޓަރު ދިިލިޕް ކުމާރުގެ ހުވަފަތް އަންހެނުން ސާއިރާ ބާނޫ އަށް ހާޓްއެޓޭކެއް ޖެހިގެން އެޑްމިޓްކޮށް އައިސީޔޫގައި ފަރުވާދޭން ފަށައިފި އެވެ.

ކުރީގެ މަޝްހޫރު ބަތަލާ އަށް މައިނަ ހާޓްއެޓޭކެއް ޖެހިގެން މުމްބާއީގެ ހިންދުންޖާ ހޮސްޕިޓަލްގައި އެޑްމިޓްކުރީ ބުދަ ދުވަހު އެވެ. އޭނާގެ އާއިލާގެ ބައެއް މީހުން ބުނެފައިވާ ގޮތުގައި ދިލިޕް ވަކިވެދިޔަ ފަހުން ސާއިރާ، 77، އުޅެނީ ވަރަށް ބޮޑު މާޔޫސްކަމެއްގެ ތެރޭގަ އެވެ.

ދިޕިލް މަރުވީ ޖުލައި މަހުގެ 7 ގަ އެވެ.

ފަރާ ކޮވިޑަށް ޕޮޒިޓިވް

ބޮލީވުޑްގެ މަޝްހޫރު ކޮރިއޮގްރާފަރު/ޑައިރެކްޓަރު ފަރާ ޚާން ކޮވިޑަށް ޕޮޒިޓިވްވެގެން ފަރުވާ ހޯދަން ފަށައިފި އެވެ.

އޭނާ ޖަޖެއްގެ ގޮތުގައި ބައިވެރިވަމުން އަންނަ ޒީޓީވީ "ކޮމެޑީ ޝޯ" އިން ވެސް މިހާރު ވަނީ ވަކިވެފަ އެވެ. މީޑިއާތަކުން ބުނީ ޝޯގައި ފަރާ ނެތްތަން ދެން ފޫބައްދައިދޭނީ ލަވަކިޔުންތެރިޔާ މިކާ ސިންގް ކަމަށެވެ.

"ކޮމެޑީ ޝޯ" އަކީ ޒީޓީވީން ކޮންމެ ހޮނިހިރަކާއި އާދީއްތަ ދުވަހުގެ ރޭ ގެނެސްދޭ ޝޯއެކެވެ.

ކަންގަނާގެ "ތަލައިވީ" އަށް ޔޫ ސެޓިފިކެޓް

މި މަހުގެ 10 ގައި ރިލީޒްކުރަން ނިންމާފައިވާ ކަންގަނާ ރަނާވަތުގެ ފިލްމު "ތަލައިވީ" އިން އެއްވެސް މަންޒަރެއް ކަނޑާނުލައި، ސެންޓްރަލް ބޯޑް އޮފް ފިލްމު ސަޓިފިކޭޝަން (ސީބީއެފްސީ) އިން އެ ފިލްމަށް ޔޫ ސެޓްފިކެޓް ދީފި އެވެ.

އެހެންވެ މި ފިލްމަކީ ހުރިހާ އުމުރުފުރައެއްގެ މީހުންނަށް ބެލޭނެ ފިލްމެކެވެ. އޭއެލް ވިޖޭ ޑައިރެކްޓްކޮށްފައިވާ "ތަލައިވީ" އަކީ 2016 ގައި އަވަހަރާވި އިންޑިއާގެ ޓަމިލް ނާޑޫ ސްޓޭޓްގެ ކުރީގެ ޗީފް މިނިސްޓަރު ޖަޔަލަލީތާގެ ވާހަކަ ކިޔައިދޭ ބައޮގްރަފިކަލް ޑްރާމާއެކެވެ.

އެކަމަނާގެ ރޯލު ކަންގަނާ ކުޅެފައިވާ ފިލްމުގެ ކާސްޓްގައި އަރުވިންދު ސްވާމީ، ބަގިޔާޝްރީ، މަދޫ، ރާޖް އަރުޖުން، ޕޫރްނާ އަދި ޖިއްޝޫ ސެންގުޕްތާ ފަދަ ތަރިން ހިމެނެ އެވެ.