ސަލްމާންގެ "ޓައިގާ 3" ދައްކާލައިފި

ގިނަ ބަޔަކު އިންތިޒާރު ކުރަމުން އަންނަ ސަލްމާން ހާން އާއި ކެޓްރީނާ ކައިފްގެ ސްޕައި ފިލްމު "ޓައިގާ 3"ގެ ޓްރެއިލާ އިއްޔެ ނެރެފި އެވެ.

ޔޫޓިއުބްގައި މި ފިލްމުގެ ޓްރެއިލާ އާންމުކުރިތާ 24 ގަޑިއިރު ނުވަނީސް މިހާރު ވަނީ 36 މިލިއަނަށް ވުރެ ގިނަ ވިއުސް ލިބިފަ އެވެ.

ސަލްމާން ބުނި ގޮތަށް، މި ޓްރެއިލާ އިން ވަނީ މީގެ ކުރިން ބޮލީވުޑުން ފެނިފައި ނުވާ ފެންވަރު ވަރުގަދަ އެކްޝަން މަންޒަރުތަކެއް މި ފިލްމުން ބަލައިލަން ލިބޭނެ ކަން އެނގިފަ އެވެ.

މި ފިލްމަކީ ވެސް ޔަޝް ރާޖު ފިލްމްސްގެ "ސްޕައި ޔުނިވާސް"ގެ ފިލްމެކެވެ. ރިޕޯޓްތައް ބުނި ގޮތުގައި، މި ފިލްމުގައި ދައްކާނީ ވެސް "ޓައިގާ"ގެ ދެވަނަ ފިލްމާއި އެ ޔުނިވާސްގެ އެހެން ފިލްމުތައް ކަމަށްވާ "ޕަތާން" އާއި "ވޯ"ގެ ފަހުން ހިނގާ ކަންތައްތަކެވެ.

ސަލްމާން ހާން އާއި ކެޓްރީނާއާ އެކު، މި ފިލްމުގެ މުހިންމު ރޯލުތައް ކުޅެނީ އިމްރާން ހާޝްމީ، ރެވާތީ، ރަންވީރު ޝޯރޭ، ވިޝާލް ޖެތުވާ އަދި ރިދީ އެވެ. އަދި ހާއްސަ ފެނިލުމަކުން، ޕަތާންގެ ރޯލުން ޝާހްރުކް ހާން ވެސް ފެންނާނެ އެވެ.

މި ފިލްމުގެ ޑައިރެކްޓަރަކީ "ބޭންޑް ބާޖާ ބާރަތު" އާއި "ފޭން" ކަހަލަ ފިލްމުތައް ގެނެސްދިން މަނީޝް ޝަރުމާ އެވެ.

"ޓައިގާ 3" ސިނަމާތަކުގައި އަޅުވަން ފަށަނީ އަންނަ މަހު 10 ގަ އެވެ.