ބަރަވެއްޔަށް ވެސް ޕްލާސްޓިކް ނޫން ގޮތެއް ބޭނުންވެއްޖެ

ޕްލާސްޓިކުގެ އުނދަގުލުން ތިމާވެށި ރައްކާތެރިކުރުމުގެ ޒިންމާ އޮތީ އަހަރެމެންގެ ކޮނޑުގަ އެވެ. އެކަމަކު ޕްލާސްޓިކު "ކޮނޑުގައި އަޅައިގެން" އޭގެ އުނދަގޫ ތަހައްމަލުކުރަނީ މަތީގައި އެއިން ފޮޓޯއިން ފެންނަ ކަހަލަ ބަރަވެއްޔާއި އަދިވެސް ކަނޑުގެ އެހެން ދިރުންތަކެވެ. އޭގެ އިހުސާސްތައް ނޭނގުނަސް، މި ބަރަވެލިތައް ވެސް ތިބޭނީ "ޕްލާސްޓިކް ނޫން ގޮތެއް" ބޭނުން ވެފައިކަން ޔަގީނެވެ.

މިދިޔަ ހަފުތާގައި އިންސްޓަގްރާމް ޕޭޖަކުން ފެނުނު ކުރު ވީޑިއޯއެކެވެ؛ އޭގެން ފެންނަނީ ބަރަވެއްޔެއްގެ ގުދުރަތީ ފޫގަނޑުގެ ބަދަލުގައި، މެދުން ބުރިވެފައި އޮތް ޕްލާސްޓިކް ފުޅިއެއްގެ ބައެއް އޭގެ ގައިމަތީގައި އޮންނަ ތަނެވެ. އެ ސޮރު ހެލިފެލިވެ އުޅެނީ އެ ފުޅިގަނޑު ގައިމަތީގައި އޮވެގެންނެވެ.

މި ވީޑިއޯ ނެގީ ދަނޑުވެރިކަމަށް ބޭނުންކުރާ ރަށެއް ކަމަށްވާ ހދ. މާފަހީގައި މަސައްކަތު އުޅޭ ދިވެއްސެއް ކަމަށްވާ މުހައްމަދު ފައިޒާން އެވެ. އޭނާ ކިޔައިދިން ގޮތުގައި ބަރަވެލީގެ ފޫގަނޑުގައި މި ކަހަލަ ފުޅީގެ އިތުރުން އެކި ކަހަލަ އެއްޗެހި ހުންނަތަން މިހާރު ވަރަށް އާންމުކޮށް ފެނެ އެވެ.

"މަސައްކަތް ނިންމާލައިފައި ހަވީރު އަތިރިމަތީ ހިނގާލަން ނިކުމެ އުޅޭއިރު ފެންނަ އެއްޗެހި މިއީ،" އޭނާ ބުންޏެވެ.

އޭނާ ބުނީ ޕްލާސްޓިކް ފުޅީގެ އިތުރުން ފުޅީގެ މަތިގަނޑާއި ކިރު ދަޅުގައި ހުންނަ ޕްލާސްޓިކް ސަމުސާ ކަހަލަ އެއްޗެހި ބަރަވެލީގެ ފޫގަނޑުގައި އޮންނަތަން ފެނިފައިވާ ކަމަށެވެ. އޭނާ އެ އެއްޗެހީ ފޮޓޯ އާއި ވީޑިއޯ ވެސް ނެގި އެވެ. މިހާރު އާންމުވެފައިވާ ވީޑިއޯ އޭނާ ނަގާފައި ވަނީ މިދިޔަ މަހު ކުރީ ކޮޅެވެ. އޭގެ ކުރިންނާއި ފަހުން ވެސް އެކި ދުވަސް މަތިން މި އެއްޗެހި ފެނިފައިވެ އެވެ.

"އާންމުކޮށް ބަރަވެލީގެ ރީތި ފޫގަނޑު ނުވެއް އޮވޭ. މިހެން ވަނީ ސީދާ ކިހިނެއްވެގެން ކަމެއް ނޭނގެ ބުނަން. އެކަމަކު މިހެން ވަނީ ކޮންމެ ގޮތެއް ވިޔަސް މޫދާއި ކަނޑުގައި ކުނި ގިނަވީމަ ކަން އެބަ އެނގޭ،" ފައިޒާން ބުންޏެވެ.

ޕްލާސްޓިކް ކުންޏަކީ ބަރަވެލި "މާ ގަޔާވާ" އެއްޗެއް

ތިމާވެށީގެ އެކި ދިރާސާތައް ޝައިއުކުރާ ވެބްސައިޓެއް ކަމަށްވާ ސައިންސް ޑިރެކްޓުގައި އާންމުކުރި "މެރިން ޕޮލިއުޝަން ބުލެޓިން" ޖާނަލްގައި ބުނެފައިވާ ގޮތުގައި ޕްލާސްޓިކް ކުންޏަކީ ބަރަވެލި "މާ ގަޔަވާ" އެއްޗަކަށް މިހާރު ވަނީ ވެފަ އެވެ. އޭގެ ސަބަބެއް ކަމަށް ބުނެފައި ވަނީ ޕްލާސްޓިކުގައި ހުންނަ ކެމިކަލްގެ މާއްދާއެއް ކަމަށްވާ "އޮލީމައިޑް" އަކީ ބަރަވެލީގެ ނޭވަލުން އަވަސްކޮށްދޭ އެއްޗަކަށް ވުމެވެ.

މާނައަކީ ބަރަވެލި ދެކެނީ ޕްލާސްޓިކަކީ އެއަށް ލިބޭ ކާނާއެއްގެ ގޮތުގަ އެވެ.

މިއީ ބަރަވެއްޔަށް "މާ އުފާވެރި" ކަމަކަށް ވިޔަސް، މިއީ ކަނޑުގެ ދިރުންތަކުގެ އާންމު ދިރިއުޅުމަށް ޕްލާސްޓިކުގެ ސަބަބުން ކޮށްފައިވާ ނޭދެވޭ އަސަރު ދައްކައިދޭ ކަމެއް ކަމަށް ބުނެފައިވެ އެވެ.

މި ދިރާސާ އިތުރަށް ޔަގީންކުރުމަށްޓަކައި އިނގިރޭސިވިލާތުގެ ޔުނިވާސިޓީ އޮފް ހަލް އިން ވަނީ 40 ބަރަވެލި، އެކުއޭރިއަމް އަކަށް ގެންގޮސްގެން ދިރާސާއެއް ކޮށްފަ އެވެ. އެ ދިރާސާ އިން ވެސް ޔަގީންވި ގޮތުގައި ޕްލާސްޓިކަކީ ބަރަވެލި މާ ގަޔާވާ އެއްޗަކަށް ވަނީ އޭގައި ހުންނަ ކެމިކަލް މާއްދާއެއްގެ ސަބަބުންނެވެ.

ގުދުރަތީ ފޫގަނޑެއްގެ ބަދަލުގައި ބަރަވެލީގެ ފޫގަނޑުގައި ޕްލާސްޓިކް ހުރުން އާންމުވާ މައްސަލައާ ގުޅިގެން، އެމެރިކާގެ ނޭޝަނަލް ލައިބްރަރީ އޮފް މެޑިސިންގައި މިދިޔަ އަހަރު ޝާއިއުކުރި ދިރާސާއެއްގައި ބުނެފައި ވަނީ އެކަން ވެސް އާންމުވީ މި ކެމިކަލް މާއްދާގެ ސަބަބުންނެވެ. ޓޭންކަކަށް 64 އަންހެން ބަރަވެލީގެ މަސްގަނޑު ލައިގެން ބެލި ބެލުމުން އެނގުނީ ގުދުރަތީ ފޫގަނޑެއްގެ ބަދަލުގައި ޕްލާސްޓިކާ އެ އެއްޗެހި މާ ގަޔާވާކަމެވެ.