މޭޔަރު މުއިއްޒަށް މަރުގެ އިންޒާރުދިން މައްސަލައެއް ބަލަނީ

މާލޭގެ މޭޔަރު ޑރ. މުހައްމަދު މުއިއްޒަށް މީހަކު މަރުގެ އިންޒާރު ދިން މައްސަލައެއް ފުލުހުން ބަލަން ފަށައިފި އެވެ.

ފުލުހުންގެ މީޑިއާ އޮފިޝަލަކު "މިހާރު" އަށް ވިދާޅުވީ މުއިއްޒަށް މަރުގެ އިންޒާރުދީ ބިރު ދެއްކި މައްސަލައެއް ބަލައިދިނުމަށް އެދި ސިޓީއެއް ފޮނުވާފައިވާ ކަމަށާއި އެހެންވެ، އެކަމާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށެވެ.

ކުރިން ހައުސިން މިނިސްޓަރުކަން ވެސް ކުރައްވާފައިވާ މުއިއްޒަށް އިންޒާރު ދީފައި ވަނީ، އެނގިފައިވާ ގޮތުގައި، އޭނާގެ ފޭސްބުކް ޕޭޖަށް ފޮނުވި މެސެޖެއްގަ އެވެ. އެ މެސެޖުގައި ލިޔެފައި ވަނީ "ކަލޭ މަރާލާނަން" އެވެ.

މާލޭ ސިޓީ ކައުންސިލުން ފުލުހުންނަށް ފޮނުވި ސިޓީގައި ބުނެފައި ވަނީ މި އިންޒާރުގެ އަމަލަކީ އެ ކައުންސިލުން ބަލައިގަންނާނެ އަމަލެއް ނޫން ކަމަށާއި ރައްޔިތުން އިންތިހާބުކޮށްފައިވާ މީހެއްގެ ފުރާނާ ދުއްވާލުމަށް އިންޒާރުދިނުމަކީ ވަރަށް ނާތަހުޒީބު، ފިނޑި އަމަލަކަށް ވަތީ އެކަން ކުށްވެރިކުރާ ކަމަށެވެ.

މި އިންޒާރު ދިން މީހާ ވީހާ ވެސް އަވަހަކަށް ހޯދާއި، މި މައްސަލަ ބަލައިދިނުމަށް އެ ސިޓީގައި އެދިފައިވެ އެވެ.