އިތުރު 15 ރަށަކަށް އެމްބިއުލާންސް ގެނެސްފި

އެމްބިއުލާންސް ފޮނުވަން ސަރުކާރުން ކަނޑައެޅި ރަށްތަކުގެ ތެރެއިން އިތުރު 15 ރަށަކަށް ފޮނުވާނެ އެމްބިއުލާންސްތައް އިއްޔެ މާލެ ގެނެސްފި އެވެ. މިއީ ހެލްތު މިނިސްޓްރީން އެސްޓީއޯއާ ހަވާލުކޮށްގެން ރާއްޖެ ގެންނަން އެމްބިއުލާންސްތަކުގެ ތިން ވަނަ ޝިޕްމެންޓެވެ.

އިފްރާޒް އަލީ

09 ފެބުރުއަރީ 2022

އެސްޓީއޯ އިން ބުނީ ވަރަށް އަވަހަށް މި އެމްބިއުލެންސްތައް ރަށްރަށަށް ފޮނުވަން ފަށާނެ ކަމަށެވެ.

އެ ކުންފުނި މެދުވެރިކޮށް ގަނެފައިވާ 20 އެމްބިއުލާންސްގެ ފުރަތަމަ ޝިޕްމެންޓް ގެނައީ މިދިޔަ އަހަރު އޮކްޓޯބަރުގަ އެވެ. އޭގެ ފަހުން، 20 އެމްބިއުލާންސްގެ ދެވަނަ ޝިޕްމެންޓް ގެނައީ މިދިޔަ އަހަރު ނޮވެމްބަރުގަ އެވެ. މިހާރު އެ ހުރިހާ އެމްބިއުލާންސްތަކެއް ވަނީ ރަށްރަށް ފޮނުވައިފަ އެވެ.

The third batch of Ambulances have arrived to Male’ as mutually agreed on the MOU signed between STO and @MoHmv. We aim to dispatch this additional 15 ambulances to the respective islands soon. pic.twitter.com/vwfuURRRzy
— STO (@stoplc) February 8, 2022

ސަރުކާރުގެ އަމާޒުކުރީ މިދިޔަ އަހަރު ނިމުމުގެ ކުރިން 60 ރަށަކަށް އެމްބިއުލާންސް ފޮނުވާށެވެ. އެކަމަކު އަހަރު ނިމުނުއިރު، އެ އަމާޒު ހާސިލުނުވެ އެވެ.

ބައެއް ރަށްރަށުގައި އެމްބިއުލާންސް ހަލާކުވެ، އެ ހިދުމަތް މެދުކެނޑިފައި އޮތުމުން ގިނަ ދަތިތައް ކުރިމަތިވާކަމުގެ ޝަކުވާ ލިބެ އެވެ. ކޮވިޑްގެ ހާލަތު އެންމެ ގޯސްވި ދުވަސްވަރު ވެސް، އެމްބިއުލާންސް ނެތުމުންނާއި ހަލާކުވެފައި އޮތުމުން ދަތިތަކާ ކުރިމަތިވި އެވެ.

Comments