މާލޭގައި އެކްސިޑެންޓެއް ހިނގައި ސައިކަލު ފަޅު ތެރެއަށް

މާލޭގެ އެއް ނަމްބަރު ފާލަން ކައިރިން ދުއްވާފައި ދިޔަ ސައިކަލެއް އޯވަޓޭކް ކުރަން އުޅުމުގެ ތެރޭގައި އެހެން ސައިކަލެއްގައި ޖެހިގެން އެކްސިޑެންޓް އިއްޔެ ވެއްޖެ އެވެ.

ފުލުހުން ބުނީ ސައިކަލެއް އޯވާޓޭކް ކުރަން އުޅެނިކޮށް އެކްސިޑެންޓުވި ކަމުގެ ރިޕޯޓް ފުލުހުންނަށް ލިބުނީ މެންދުރުފަހު 3 ޖަހަނިކޮށް ކަމަށެވެ. އެ އެކްސިޑެންޓާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ބުނި ނަމަވެސް އެ ހާދިސާގެ ތަފްސީލެއް ފުލުހުން ނުދެ އެވެ.

ސޯޝަލް މީޑިއާގައި އާންމުވެފައިވާ ވީޑިއޯގައި ފެންނަނީ ހުޅުމާލޭ ފެރީ ޓާމިނަލްއާ ދިމާލުން އެއް ނަމްބަރު ފާލަމާ ދިމާލަށް މަގުގެ ކަނާއަތް ފަރާތުން ދުއްވާފައި ދިޔަ ސައިކަލެއް ވާއަތް ފަރާތަށް ގާތްކުރަން އުޅެނިކޮށް ފަހަތުން ތަންކޮޅެއް ބާރަށް ދުއްވާފައި ދިޔަ ސައިކަލު އޯވާޓެކް ކުރަން އުޅެނިކޮށް އަނެއް ސައިކަލުގައި ޖެހޭ މަންޒަރެވެ. ފަހަތުން އައި ސައިކަލުގައި އެންމެ މީހަކު އިނަސް ކުރީގައި އިން ސައިކަލުގައި ދެ މީހަކު ތިއްބެވެ.

ދެ ސައިކަަލު ޖެހި ތިން މީހުން ވެސް ސައިކަލާ އެކު އެތަނަށް ވެއްޓޭއިރު ފަހަތުން އައި ސައިކަލު ވެއްޓުނީ ފަޅު ތެރެއަށެވެ. އަދި ސައިކަލު ގޮސް ޖެހިގެން ފެރީއަށް އަރާ ތަނުގައި ހުރި ދަގަނޑު ސިޑިއެއް ވެސް ފަޅުތެރެއަށް ވެއްޓޭ މަންޒަރު ވީޑިއޯ އިން ފެނެ އެވެ.

ބެލެވޭ ގޮތުގައި ކުރީގައި އިން ސައިކަލުގައި ތިބި ދެ މީހުންނަށް މާބޮޑު އަނިޔާއެއް ނުލިބެ އެވެ. އެކަމަކު ފަހަތުން އައި ސައިކަލުގައި އިން މީހާ ގޮސް ވެއްޓުނީ އެ މަގުގެ އެއް ފަރާތެއްގައި ހުރި ގަހެއްގެ ކައިރިއަށެވެ. ބެލެވޭ ގޮތުގައި އޭނާއަށް ކޮންމެވެސް ވަރަކަށް އަނިޔާވި އެވެ. އެކަމަކު ލިބުނު އަނިޔާގެ ތަފްސީލު ސާފެއް ނުވެ އެވެ.