ސުއޭޒް ކެނަލް އިން މި އަހަރު ހަތް ބިލިއަން ޑޮލަރު ލިބޭނެ ކަމަށް ލަފާކުރެވޭ

ގާހިރާ (މެއި 23) - މިސްރުގެ ސުއޭޒް ކެނަލް އިން މި އަހަރު ހަތް ބިލިއަން ޑޮލަރުގެ އާމްދަނީއެއް ލިބޭނެ ކަމަށް ލަފާކުރެވޭކަމަށް އެ ގައުމުގެ ފިނޭންސް މިނިސްޓަރު ޑރ. މުހައްމަދު މާއިތު ވިދާޅުވެއްޖެ އެވެ.

ސުއޭޒް ކެނަލަކީ ގިނަ އަދަދެއްގެ ބޯޓުފަހަރު ދަތުރުކުރުމުގައި ބޭނުންކުރާ، ދުނިޔޭގެ ވިޔަފާރީގެ އެންމެ ކާރުބާރު ބޮޑު ރޫޓެވެ.

މިސްރުގެ މާލީ ހާލަތަށް ރިޔާއަތް ކުރައްވައި، ޑރ. މާއިތު ވިދާޅުވީ ޔޫކްރޭންގެ ހަނގުރާމައިގެ ގޮންޖެހުންތަކާ ކުރިމަތިވި ނަމަވެސް މިސްރުގެ މި ހިނގާ މާލީ އަހަރުގެ ތެރޭ ޓޫރިޒަމްގެ ސިނާއަތުން 10 -12 ބިލިއަން ޑޮލަރާ ދެމެދުގެ އާމްދަނީއެއް ލިބޭނެ ކަމަށް އުންމީދު ކުރައްވާ ކަމަށެވެ.

ސުއޭޒް ކެނަލް އަކީ ޔޫރަޕާއި އޭޝިއާއާ ދެމެދު އެންމެ އަވަސް ދަތުރުތައް ކުރެވޭ ރޫޓެވެ. އަދި އެއީ މިސްރުގެ ސަރުކާރަށް ބޭރުގެ ފައިސާ ލިބޭ އެންމެ ބޮޑު ވަސީލަތެވެ.

މާޗް، 2021 ގައި ވަނީ "އެމްވީ އެވަ ގިވަން" ކޮންޓެއިނާ ބޯޓު ސުއޭޒް ކެނަލް ތެރޭގައި ތާށިވެފަ އެވެ. އެ ހާދިސާއާ ގުޅިގެން 200 އެއްހާ މީޓަރު ހަނި އެ ކެނަލް އެއްކޮށް ބަންދުވި އެވެ.

ގްލޯބަލް ސަޕްލައި ޗެއިންގައި ބޮޑު ދައުރެއް އޮންނަ ސުއޭޒް ކެނަލް ބަންދުވުމާ އެކު ދުނިޔޭގެ އެކި ހިސާބުތަކަށް ދަތުރުކުރާ 300 އަށް ވުރެ ގިނަ ބޯޓު ކިޔޫ ޖެހުނެވެ. މި ކަމުގެ އަސަރު ގިނަ ވިޔާފާރިތަކަށް ވެސް ކުރިއެވެ. އަދި އެ ހާދިސާއާ ގުޅިގެން މިސްރު ސަރުކާރަށް 90 މިލިއަން ޑޮލަރާ ގާތްކުރާ އަދަދެއްގެ ގެއްލުން ލިބުނު ކަމަށް ސުއޭޒް ކެނަލް އޮޕަރޭޓްކުރާ ކުންފުނިން ވަނީ ބުނެފަ އެވެ.