ކަނޑިންމަ ރިސޯޓުން 250 ވަޒީފާގެ ފުރުސަތު ހުޅުވާލަނީ

އަލަށް ހުޅުވާ ދ. ކަނޑިންމަ ރިސޯޓުން 250 ވަޒީފާ އަށް ހުޅުވައިލުމަށް ނިންމައިފި އެވެ.

ކަނޑިންމަ މޯލްޑިވްސްގެ އޮފިޝަލަކު ޓްރެވަލް ވެބްސައިޓަކަށް އިއްޔެ ވިދާޅުވީ އަންނަ މަހު އެ ރިސޯޓް ހުޅުވުމުގެ ކުރިން، ވަޒީފާތަކަށް މީހުން ހޯދުމަށް އެކި ރަށްތަކުގައި އޯޕަން ޑޭތައް ބޭއްވުމަށް ނިންމާފައިވާ ކަމަށެވެ. އޭގެ ތެރޭގައި މާލެ އާއި ސ. ހިތަދޫ އަދި ހުޅުދު އާއި ފުވައްމުލައް ހިމެނޭ ކަމަށް އޭނާ ވިދާޅުވި އެވެ. އަދި ދ. ކުޑަހުވަދޫ، މާއެނބޫދޫ ވެސް އޭގެ ތެރޭގައި ހިމެނެ އެވެ.

"އަޅުގަނޑުމެންގެ އަމާޒަކީ 65 ޕަސެންޓް ވަޒީފާތައް ދިވެހިންނަށް ހާއްސަކުރުން،" އޮފިޝަލް ވިދާޅުވި އެވެ.

ކަނޑިންމަ ރިސޯޓަކީ އެންމެ މަތީ ފެންވަރަށް ތަރައްގީކުރާ ރިސޯޓެކެވެ. އެ ރިސޯޓުގައި 11 ކެޓަގަރީއެއްގެ 274 ކޮޓަރި ހުންނާނެެ އެވެ.

ކަނޑިންމަ ރިސޯޓް ހުޅުވާއިރު، ރާއްޖޭގެ އެންމެ ބޮޑު ޕޫލް ވެސް އޮންނާނީ އެ ރަށުގަ އެވެ. އަދި ޖިމް އާއި ވޯޓާ ސްޕޯޓްސް އާއި މެރިން ބައިލޮޖީ ސްކޫލަކާއި ކިޑްސް ކްލަބެއްގެ އިތުރުން ކެއުންބުއިމުގެ ހިދުމަތް ދޭ 10 ރެސްޓޯރަންޓް ވެސް ވަނީ ހަދައިފަ އެވެ.

ރާއްޖޭގައި ގިނަ އަދަދެއްގެ އާ ރިސޯޓް އަންނަނީ ހުޅުވަމުންނެވެ. އެގޮތުން، މިދިޔަ އަހަރު ވެސް ގާތްގަނޑަކަށް 15 ރިސޯޓް ހުޅުވާފައިވާއިރު، މި އަހަރުގެ ތެރޭގައި އިތުރު 20 ރިސޯޓް ބާޒާރަށް ނެރެން ވެސް ވަނީ ނިންމައިފަ އެވެ. އެ ތަންތަން ތަރައްގީކުރުމުގެ މަސައްކަތް މިހާރު އަންނަނީ ކުރަމުންނެވެ.

ރާއްޖޭގައި ގިނަ އާ ރިސޯޓުތަކެއް ހުޅުވާއިރު، އޭގެ ތެރޭގައި ދުނިޔޭގެ އެންމެ ބޮޑެތި ބްރޭންޑުތައް ވެސް ހިމެނެ އެވެ. އެގޮތުން އެންމެ މަތީ ފަންތީގެ ހޮޓާތަކާއި ރިސޯޓުތައް ހިންގާ ދުނިޔޭގެ އެންމެ ބޮޑު އެއް ބްރޭންޑް ކަމަށްވާ އިންޓަކޮންޓިނެންޓަލް ވެސް ހިމެނެ އެވެ.