ސުވާލު އުފެދެނީ އޭޖީގެ ދިފާއު ލިޔުމުން އެކަނި އޮތުމުން: ނަޝީދު

ބަންޑާރަ ނައިބު އިބްރާހިމް ރިފްއަތުގެ އިތުރުބާރުނެތް ކަމުގެ މައްސަލާގައި ގާނޫނީ ގޮތުން ސުވާލު އުފެދިގެން އުޅެނީ، އޭޖީގެ ދިފާއު ލިޔުމުން އެކަނި ފޮނުއްވާފައިވާތީ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ރިފްއަތުގެ އިތުބާރު ނެތް ކަމަށް ހުށަހެޅި މައްސަލާގައި ދިފާއުވުމަށް އޭނާ ވަނީ މަޖިލީހަށް ވަޑައިނުގެން، ލިޔުމުން ޖަވާބެއް ފޮނުއްވައިފަ އެވެ. ގާނޫނުއަސާސީގައި ބުނެފައިވާ ގޮތުގައި ވަޒީރެއްގެ އިތުބާރު ނެތް ކަމުގެ މައްސަލާގައި ކުރެވޭ ބަހުސްގައި އަނގަބަހުންނާއި ލިޔުމުން ދިފާއުވުމުގެ ހައްގު އެ ވަޒީރަކަށް ލިބޭނެ އެވެ.

ނަމަވެސް ރިފްއަތު މަޖިލީހަށް ހާޒިރުވެވެވަޑައިގެން ޖަވާބުދާރީވެވަޑައިގަންނަވާ ގޮތަށް ވަގުތު މަޖިލީހުގެ އާންމު ކޮމިޓީން ކަނޑައަޅާފައިވާތީ ރިޔާސަތުގައި އިންނެވި ނަޝީދު ވަނީ އެ މައްސަލަ ކުރިއަށް ގެންދިއުމާ މެދު ސުވާލު އުފެދިފައިވާ ކަމަށް ވިދާޅުވެ މައްސަލަ މަޑުޖައްސާލައިފަ އެވެ.

ޖަލްސާ އަލުން ފެއްޓެވުމަށް ފަހު ނަޝީދު ވިދާޅުވީ ޕާލަމެންޓްރީ ގުރޫޕްތަކުގެ ލީޑަރުންނާއެކު ކުރެެެއްވި މަޝްވަރާ އިން ހައްލެއް ނުލިބުނު ކަމަށެވެ.

މެޖޯރިޓީ އޮތް އެމްޑީޕީން ދެކެނީ އާންމު ކޮމިޓީގެ ނިންމުމެއް އޮތަސް ލިޔުމުން ވެސް ޖަވާބުދާރީވުމަށް ގާނޫނުއަސާސީން ލިބިދޭ ހައްގު ބޭނުން އޭޖީ އަށް ލިބިވަޑައިގަންނަވާނެ ކަމަށެވެ.

ނަމަވެސް އެމްޑީޕީ ނޫން އެހެން ހުރިހާ ޕާޓީތަކެއްގެ ވިސްނުން ހުރީ ޑޮކިއުމެންޓަރީ އެވިޑެންސާ އެކުގައި މަޖިލީހަށް ހާޒިރުވެ، ޖަވާބުދާރީ ވެވަޑައިގަންނަވަންޖެހޭ ގޮތަށެވެ. އަދި މަޖިލީހަށް ހާޒިރުވެ، ޖަވާބުދާރީވެވަޑައިނުގަންނަވާ ގޮތަކަށް ގާނޫނުއަސާސީ ބަޔާން ނުކުރާ ކަމަށް އެ މެންބަރުން ވިދާޅުވާ ކަމަށް ނަޝީދު ވިދާޅުވި އެވެ.

ނަޝީދު ވިދާޅުވީ އެމަނިކުފާނު ރިޔާސަތުގައި އިންނަވައިގެން ގާނޫނުއަސާސީ އާ ހިލާފަށް މިނިސްޓަރަކު ވަކިކުރުމުގެ މަސައްކަތް ކުރުމަކީ ކުރެއްވޭނެ ކަމެއް ނޫން ކަމަށެވެ.

"މި ބާވަތުގެ ކަންކަމުގައި އަޅުގަނޑު ޖެހޭނީ އިސްތިރާޖީ ލަފައެއް ހޯދަން. ގާނޫނުއަސާސީ މާނަ ކުރެވުނު އިރު ނުވަތަ އެކުލަވާލި އިރު އޮތް ގޮތާއި މި ބާވާތުގެ ގާނޫނީ ވާހަކަތައް އަޅުގަނޑު އެދޭ ގޮތަކީ ސުޕްރީމް ކޯޓުން ނިންމެވުން،" ނަޝީދު ވިދާޅުވި އެވެ.

އޭގެފަހުން، ހެނދުނު ސައިގެ ވަގުތަށްފަހު މަޖިލީހުގެ ޖަލްސާ އަލުން ފަށައި، މިއަދުގެ އެޖެންޑާގައި ދެން އޮތް އައިޓަމަށް ބަހުސް ފެށި ނަމަވެސް، ގިނަ މެމްބަރުން ވާހަކަ ދެއްކެވީ އިތުބާރުނެތް ކަމުގެ މައްސަލައާ ގުޅުވަ އެވެ.

އެމްޑީޕީގެ މެމްބަރުން ވިދާޅުވީ، އިތުބާރުނެތް ކަމުގެ މައްސަލަތަކުގައި އަނގަބަހުންނާއި ލިޔުމުން ދިފާއުވުމުގެ ހައްގު ވަޒީރުންނަށް ލިބޭ ކަމަށް ގާނޫނުއަސާސީގައި އޮންނަ ކަމަށެވެ. އެހެންކަމުން އަނގަބަހުން ދިފާއުވުމުގެ ހައްގަކީ ބޭނުންކުރުން ލާޒިމު ހައްގެއް ނޫން ކަމަށާއި، ރިފްއަތުގެ މައްސަލަ މަޖިލީހުގައި ކުރިއަށް ނުގެންދެވޭނެ އެއްވެސް ސަބަބެއް ނެތް ކަމަށް ވިދާޅުވި އެވެ.

އޭގެ ރައްދުގައި ނަޝީދު ވިދާޅުވީ ގާނޫނުއަސާސީގައި އޮންނަ ގޮތާމެދު ސުވާލު އުފެދިގެން އުޅެނީ ރިފްއަތުގެ ދިފާއު ހަމައެކަނި ލިޔުމުން ފޮނުއްވާފައިވާތީ ކަމަށެވެ.

"...އަނގަބަހުންނާއި ލިޔުމުން އޭނާގެ ދިފާއުގައި މަސައްކަތްކުރުމުގެ ހައްގު އެ މެމްބަރަކަށް ލިބިގެންވެއޭ. މިސާލަކަށް މީގައި މި އިންނަނީ އަނގަބަހުން ނުވަތަ ލިޔުމުންނެއް ނޫން،" ގާނޫނުއަސާސީގެ 101 ވަނަ މާއްދާއާ ހަވާލާދެއްވައި ނަޝީދު ވިދާޅުވި އެވެ.

އެމަނިކުފާނު ވިދާޅުވި ގޮތުގައި އެ ހައްގު ދޫކޮށްލެއްވުމުގެ ހައްގު ބަންޑާރަ ނައިބަށް ވެސް ލިބިވަޑައިގަންނަވާނެ ކަމަށާއި ނަމަވެސް، އޮޅުން އަރަނީ އެ ހައްގު އެކީގައި ދޫކޮށްނުލައްވައި، ލިޔުމުން އެކަނި ދިފާއު ފޮނުއްވާފައިވާތީ އެވެ.

ސުޕްރީމް ކޯޓުގެ ލަފާ ހޯދޭނީ މަޖިލީހުން ފާސްކޮށްގެން

ރިފްއަތުގެ އިތުބާރުނެތް ކަމުގެ މައްސަލަ ކުރިއަށް ގެންދަން ސުޕްރީމް ކޯޓުގެ ލަފާ ހޯދަން ނަޝީދު ނިންމެވި ނިންމުމާމެދު ވެސް އެމްޑީޕީ މެމްބަރުން ސުވާލު އުފެއްދެވި އެވެ.

ގާނޫނުއަސާސީގެ 95 ވަނަ މާއްދާގައިވާ ގޮތުން ސުޕްރީމް ކޯޓުގެ އިސްތިޝާރީ ލަފައެއް ހޯދުމަށް ހުށަހެޅޭނީ މަޖިލީހުން ފާސް ކުރާ ގަރާރަކުން ކަން ފާހަގަކުރެއްވި އެވެ.

އެކަމާ ގުޅިގެން ނަޝީދު ވިދާޅުވީ މަޖިލީހުން ފާސްނުކޮށް އެފަދަ ލަފައެއް ނުހޯދޭނެކަން އެނގިވަޑައިގަންނަވާ ކަމަށެވެ.

"މަޖިލީހުން ފާސްކުރަން ހުށަހަޅައި، މަޖިލީހުން ފާސްވެއްޖެ ނަމަ މި މަޖިލީހަށް ލިބޭނީ،" އެކަމުގެ އިތުރު ތަފްސީލެއް ނުދެއްވައި އެމަނިކުފާނު ވިދާޅުވި އެވެ.