އިންޑިއާއިން ބަލަނީ ސިފައިން ނުގެންގޮސް ވާނެ ގޮތެއް

އިންޑިއާއިން ބަލާނީ ރާއްޖޭގައި އޮޕަރޭޓްކުރާ ޑޯނިއާ މަތިންދާބޯޓާއި ހެލިކޮޕްޓަރު އަނބުރާ ނުގެންގޮސް، އެ އުޅަނދުތަކާ އެކު ރާއްޖޭގައި ތިބި އިންޑިއާ ސިފައިން ވެސް ނުގެންގޮސް ވޭތޯ ކަމަށް އިންޑިއާގެ އިސް ބައެއް އޮފިޝަލުންނާ ހަވާލާދީ އެ ގައުމުގެ ނޫހަކުން ބުނެފި އެވެ.

ރައީސް ޑރ. މުހައްމަދު މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ، 100 ދުވަސް ތެރޭ އިންޑިއާ ސިފައިން ފޮނުވާލުމާ ގުޅޭ ގޮތުން އިންޑިއާއާ އެކު މަޝްވަރާކޮށް އެކަން ކުރިއަށް ގެންދަން ކޯ ގްރޫޕެއް އެކުލަވާލަން ދެ ގައުމުން މިހާރު ވަނީ އެއްބަސްވެފަ އެވެ. ރައީސް ޑރ. މުއިއްޒު ވިދާޅުވެފައިވާ ގޮތުގައި ދުބާއީގައި ބޭއްވި ކޮޕް23 ސަމިޓްގެ ހަވާސާގައި އިންޑިއާގެ ބޮޑުވަޒީރު ނަރެންދުރަ މޯދީއާ އެކު ކުރެއްވި މަޝްވަރާގައި އިންޑިއާ އިން ވަނީ ސިފައިން ގެންދަން އެއްބަސް ވެފަ އެވެ.

ރައީސްގެ އެ ވާހަކަފުޅާ ގުޅޭ ގޮތުން އިންޑިއާ އިން ރަސްމީކޮށް މިހާތަނަށް ބުނި ހަމައެކަނި ވާހަކަ އަކީ މަޝްވަރާތައް ކުރިއަށް ގެންދާ ކަމާއި ހެލިކޮޕްޓަރާއި މަތިންދާބޯޓު ރާއްޖޭގައި ބޭއްވުމުގެ މުހިންމުކަން ދެ ގައުމުން ވެސް ގަބޫލުކުރާ ކަމަށެވެ.

އިންޑިއާ ސިފައިން ގެންދަން އެއްބަސްވިތޯ އެ ގައުމުގެ ނޫސްތަކުން ކުރި ސުވާލުތަކަށް އެކްސްޓާނަލް އެފެއާޒް މިނިސްޓްރީން ޖަވާބެއް ނުދިން ކަމަށް މީޑިއާގައި ރިޕޯޓް ކޮށްފައިވެ އެވެ.

"ޑެކަން ހެރަލްޑް" ނޫހުން ބުނީ ދެ ގައުމުގެ ވެރިންގެ މަޝްވަރާތައް ކުރިއަށް ގެންދިޔައީ ޕްރައިވެޓްކޮށް ކަމަށާއި އެހެންވެ މަޝްވަރާތަކާ ބެހޭ ގޮތުން ރަސްމީކޮށް ކޮމެންޓެއް ކުރަން އޮފިޝަލުން އިންކާރު ކުރައްވާ ކަމަށެވެ. އެކަމަކު މަޝްވަރާތަކުގައި އިންޑިއާއިން ވާހަކަ ދައްކަނީ ސިފައިންނާއި ހެލިކޮޕްޓަރާއި މަތިންދާބޯޓު ވެސް އަނބުރާ ނުގެންގޮސް ވާނެ ގޮތަކަށް ކަމަށް އޮފިޝަލުންނާ ހަވާލާދީ އެ ނޫހުގައި ބުނެފައިވެ އެވެ.

އިތުރު އެއްވެސް ތަފްސީލެއް ނުދެ އެވެ.

ސަރުކާރުން ބުނެފައިވާ ގޮތުގައި ރާއްޖޭގައި އިންޑިއާގެ 77 ސިފައިން އެބަތިބި ކަމަށް މިހާތަނަށް ހޯދިފައިވެ އެވެ. އެއީ ހެލިކޮޕްޓަރާއި މަތިންދާބޯޓު އޮޕަރޭޓްކުރަން ތިބި މީހުން ކަމަށް ވެސް ވަނީ ބުނެފަ އެވެ.

ރާއްޖޭގައި ތިބި އިންޑިއާ ސިފައިން ފޮނުވާލަން އިދިކޮޅުގައި ތިބެ މިހާރުގެ ސަރުކާރުން "އިންޑިއާ އައުޓް" ނަމުގައި ވަރުގަދަ ކެމްޕެއިނެއް ހިންގި އެވެ. އަދި އެކަމާ ދެކޮޅަށް އޭރުގެ ސަރުކާރުން ވެސް މަސައްކަތްކޮށް، ކެމްޕެއިން ހުއްޓުވަން ހަރުކަށި ފިޔަވަޅުތައް އެޅި އެވެ.