ޕީއެސްއެމްގެ ހިޔާނާތް: ފައިނޭންސް ޑިރެކްޓަރާއި ދަރިފުޅުގެ އެކައުންޓަށް މިލިއަނުން ޖަމާކުރި

ޕީއެސްއެމް އިން ޑޮލަރު މާރުކުރުމަށާއި އާމްދަނީން އަދި ތިޖޫރީން ނުވަ މިލިއަން ރުފިޔާ ގެއްލިފައިވާ ކަމަށާއި ގިނަ އަދަދެއްގެ ފައިސާ ކުރީގެ ފައިނޭންސް ޑިރެކްޓަރާއި އޭނާގެ ދަރިއެއްގެ އެކައުންޓަށް ޖަމާކޮށްފައިވާ ކަމަށް އޮޑިޓް ރިޕޯޓުން ހާމަވެއްޖެ އެވެ.

އޮޑިޓް ރިޕޯޓުގައި ބުނެފައި ވަނީ އެ ކުންފުނިން ގެއްލިފައި ވަނީ 2020 އިން 2024 ވަނަ އަހަރުގެ އޭޕްރީލް މަހުގެ ނިޔަލަށް އެކައުންޓަށް ޖަަމާކޮށްފައިވާ 4.6 މިލިއަން ރުފިޔާ އާއި 2017 އިން 2024 ވަނަ އަހަރުގެ އޭޕްރީލަށް އާމްދަނީގެ ގޮތުގައި ލިބިފައިވާ ފައިސާގެ ތެރެއިން 4.3 މިލިއަން ރުފިޔާ އަދި ތިޖޫރީގައި ހުރި 190،000ރ. ކަމަށެވެ.

އޮޑިޓް ރިޕޯޓުގައި ބުނެފައި ވަނީ 2020 ވަނަ އަހަރުން 2024 ވަނަ އަހަރުގެ އޭޕްރީލް މަހުގެ ނިޔަލަށް 373،988 ޑޮލަރު ގަތުމަށް 5.8 މިލިއަން ރުފިޔާ ޕީއެސްއެމްގެ ބޭންކް އެކައުންޓުން ނެގި ކަމަށެވެ. ނަމަވެސް، އޭގެ ތެރެއިން 80 ޕަސެންޓު ފީއެސްއެމަށް ނުލިބޭ ކަމަށް ބުނެފައިވެ އެވެ. ޕީއެސްއެމަށް ލިބުނީ އެ ރުފިޔާއަށްވާ ޑޮލަރުގެ ތެރެއިން އެންމެ 76،731 ޑޮލަރު އެކަންޏެވެ. ބާކީ 297،257 ޑޮލަރު އެ ކުންފުންޏަށް ވަދެފައިވާކަން އެނގެން ނެތް ކަމަށް ވެސް އޮޑިޓް ރިޕޯޓުގައި ބުނެފައިވެ އެވެ.

އޮޑިޓް ރިޕޯޓުން އެނގޭ ގޮތުގައި، ޑޮލަރު ގަތުމަށް ހިންގި މުއާމަލާތްތަކުގެ ތެރެއިން 4.5 މިލިއަން ރުފިޔާ ދޫކޮށްފައި ވަނީ ޗެކް މެދުވެރިކޮށެވެ. އޭގެ ތެރެއިން 968،580ރ. އާ ހަވާލުވެ، ސޮއިކޮށްފައި އޮތީ ޕީއެސްއެމްގެ ކުރީގެ ފައިނޭންސް ޑައިރެކްޓަރެވެ.

އޭރު އެ މަގާމުގައި ހުރީ އަހްމަދު ހަނީފެވެ. މި މައްސަލައާ ގުޅިގެން މިދިޔަ އޭޕްރީލް މަހު އޭނާ ސަސްޕެންޑް ކުރުމަށް ފަހު، މެއި މަހު ވަނީ އޭނާ ވަނީ ވަޒީފާ އިން ވެސް ވަކިކޮށްފަ އެވެ. އަދި ޕީއެސްއެމް އިން ވަނީ އެ މައްސަލަ ފުލުހުންނަށް ވެސް ހުށަހަޅައިފަ އެވެ.

"ބާކީ ހުރި ފައިސާ ނުލިބިގެން ފައިސާ ނަގަން ބޭންކަށް ދިޔަ މުވައްޒަފުންނާ މެދު އެއްވެސް ފިޔަވަޅެއް އަޅާފައި ނުވުމާއި އަދި އާންމު ގޮތެއްގައި ޕީއެސްއެމްގެ ބޭންކް އެކައުންޓުން ރުފިޔާ ނަގައިގެން ޑޮލަރު ގަތުމުގެ ކަންކަން ކުރިއަށް ގެންގޮސްފައި ވަނީ ޕީއެސްއެމްގެ ކުރީގެ ފައިނޭންސް ޑިރެކްޓަރު ކަމަށް ވާތީ ޑޮލަރު ގަތުމަށް ބޭންކުން ނެގި ފައިސާ އޭނާއާ ހަވާލުކޮށްފައިވާ ކަމަށް ބެލެވެ އެވެ،" އޮޑިޓް ރިޕޯޓުގައިވެ އެވެ.

ހަނީފުގެ ދަރީގެ އެކައުންޓަށް ވެސް ފައިސާ ޖަމާކުރި

އޮޑިޓް އޮފީހުން ބުނީ، އޮންލައިންކޮށް ޑޮލަރު ގަންނަން ހިންގި މުއާމަލާތެއްގައި 1.3 މިލިއަން ރުފިޔާއަށްވާ 75،491 ޑޮލަރަށް 1.2 މިލިއަން ރުފިޔާ ހަނީފުގެ ދަރިއެއްގެ ބޭންކް އެކައުންޓަށް އެކި ފަހަރު މަތިން ޖަމާކޮށްފައިވާކަން ފާހަގަކުރެވިފައިވާ ކަމަށެވެ.

އޮންލައިން ޓްރާންސްފާކޮށްގެން ޑޮލަރުގެ މުއާމަލާތް ހިންގުމުގެ ނަމުގައި 405،122ރ. ގެ ޕޭމަންޓް ވައުޗާތަކުގައި ހުއްދަ ދިނުމުގެ ގޮތުން ސޮއިކޮށްފައި ވަނީ ވެސް ހަނީފު އެކަނި ކަމަށް އޮޑިޓް އޮފީހުން ބުންޏެވެ. އަދި އެއްވެސް މީހަކު ސޮއިނުކޮށް 30،000ރ. ގެ މުއާމަލާތް ހިންގާފައިވާ ކަމަށް ވެސް އޮޑިޓުގައި ބުނެފައިވެ އެވެ.

ބޭރުގެ ކުންފުންޏެއްގެ 10 ބިލަކަށް ބޭނުންވާ ޑޮލަރު ގަތުމަށް އެއް ފަހަރަށް ވުރެ ގިނަ ފަހަރަށް އެއް ބިލްތަކެއް ބޭނުންކޮށްގެން ތަކުރާރުކޮށް ޕީއެސްއެމްގެ ރުފިޔާ އެކައުންޓުން 254،152ރ. ނަގާފައިވާކަން ވެސް އޮޑިޓުން ހާމަވެފައިވެ އެވެ. އަދި އިތުރު ހަތަރު ފަރާތެއްގެ ބިލަށް ފައިސާ ދެއްކުމަށް ޑޮލަރު ގަތުމަށް އެކި ފަހަރު މަތިން 1.1 މިލިއަން ރުފިޔާ ނެގުމަށް ފަހު އެ ބިލްތަކަށް ދައްކަން ޖެހޭ ފައިސާ އަލުން ޕީއެސްއެމްގެ ބޭންކް އެކައުންޓަށް ޖަމާކުރިކަން ވެސް ފާހަގަކުރެވުނު ކަމަށް އޮޑިޓްގައިވެ އެވެ.

އޭގެ އިތުރުން އެހެން ތިން ބިލަކަށް ފައިސާ ދެއްކުމަށް 15،000 ޑޮލަރު ގަންނަން 231،300ރ. އެކައުންޓުން ނެގުމަށް ފަހު، ޕީއެސްއެމްގެ ޑޮލަރު އެކައުންޓަށް އެހެން ފަރާތްތަކުން ޖަމާކޮށްފައިވާ ޑޮލަރު ބޭނުންކޮށްގެން އެ ބިލްތަކަށް ފައިސާ ދައްކާފައި ވެސް ވެ އެވެ.

އޮޑިޓް އޮފީހުން ބުނީ، ޑޮލަރުގެ މުއާމަލާތްތައް ހިންގުމުގައި ޕީއެސްއެމްގެ ކުރީގެ ފައިނޭންސް ޑިރެކްޓަރު ހަނީފުގެ އަމިއްލަ ޑޮލަރު އެކައުންޓުން ޖަމާކުރި 10،947 ޑޮލަރާއި އޭޓީއެމް މެދުވެރިކޮށް ޖަމާކުރި 8،060 ޑޮލަރާއި ހަނީފުގެ ދަރިއެއްގެ އެކައުންޓުން ޕީއެސްއެމްގެ އެކައުންޓަށް ޖަމާކޮށްފައިވާ 36،071 ޑޮލަރު ހިމެނޭ ކަމަށެވެ.

އޮޑިޓް އޮފީހުން އާންމުކުރި ރިޕޯޓުގައިވާ ގޮތުން 2017 އިން 2024 ގެ އޭޕްރީލްގެ ނިޔަލަށް އެ ކުންފުންޏަށް ނަގުދު ފައިސާގެ ގޮތުގައި ލިބުނު 4.3 މިލިއަން ރުފިޔާ އެ ކުންފުނީގެ އެކައުންޓަށް ޖަމާނުވާ އިރު އޭގެ ތެރެއިން 4.1 މިލިއަން ރުފިޔާއާ ހަވާލުވެފައި ވަނީ ހަނީފުކަން ލިޔެކިޔުމުން ފެންނަން އެބަހުރި ކަމަށެވެ.

އޮޑިޓް އޮފީހުން ވަނީ، ޑޮލަރު ގަތުމަށާއި އާމްދަނީން އަދި ނަގުދު ފައިސާގެ ތެރެއިން ގެއްލުނު ނުވަ މިލިއަން ރުފިޔާ ހޯދުމަށް، އެ ކަންކަމުގައި ޒިންމާވާ ފަރާތްތައް ހޯދައި ފިޔަވަޅު އެޅުމަށްޓަކައި އެ މައްސަލަ އެންޓި ކޮރަޕްޝަން ކޮމިޝަނަށް ހުށަހެޅުމަށް އަންގައިފަ އެވެ.