ފިޔޯރީގައި މަސްކާރުހާނާއެއް ހަދަން އަންނަ މަހު ޗައިނާގެ ބަޔަކާ އެކު ސޮއިކުރަނީ

ގދ. ފިޔޯރީގައި މަސް ބަންދު ކުރާ ބޮޑު ކާރުހާނާއެއް ހެދުމުގެ އެއްބަސްވުމެއްގައި އަންނަ މަހު ސޮއިކުރާނެ ކަމަށް ރައީސް ޑރ. މުހައްމަދު މުއިއްޒު ރޭ އިއުލާން ކުރައްވައިފި އެވެ.

ގއ. އާއި ގދ. އަތޮޅުގެ ބައެއް ރަށްރަށަށް އެ މަނިކުފާނު އިއްޔެ ފެއްޓެވި ދަތުރުފުޅުގައި ފިޔޯރީގައި ވާހަކަފުޅު ދައްކަވަމުން ވިދާޅުވީ މި ރަށް އަދި އަތޮޅުގެ އެހެން ރަށްރަށަށް މަސްވެރިކަމަކީ އެންމެ މުހިއްމު ސިނާއަތް ކަމަށެވެ. އެހެންވެ، ފިޔޯރީ އަށް ކަމެއް ކޮށްދޭ ނަމަ އެންމެ މުހިއްމު ވާނީ މަސްވެރިކަމާ ގުޅުން ހުރި ކަމެއް ކޮށްދިނުން ކަމަށް ވިދާޅުވި އެވެ.

ރިޔާސީ އިންތިހާބުގެ ތެރޭގައި ރައީސް މުއިއްޒު ވަނީ މި ރަށުގައި މަސްކިރާ ކާރުހާނާއެއް އަޅައިދިނުމަށް ވަައުދުވެޑައިގެންފަ އެވެ. އޭގެ އަމަލީ މަސައްކަތް ފެށުމަށް އަންނަ މަހު ޗައިނާގެ ބަޔަކާ އެކު އެއްބަސްވުމެއްގައި ސޮއިކުރާނެ ކަމަށް ރައީސް ވިދާޅުވި އެވެ.

އެ ފެކްޓްރީއަކީ؛

- ދުވާލަކު 100 ޓަނުގެ ދަޅުމަސް ބަންދުކުރެވޭނެ ތަނެއް.

- ތިންހާސް ޓަނުގެ ކޯލްޑް ސްޓޯރޭޖް ހުންނާނެ.

- ފަންސާސް ޓަނުގެ އައިސް ޕްލާންޓެއް ހުންނާނެ.

ރައީސް ރޭ ވިދާޅުވީ އެ ވައުދު ފުއްދުމަށް ފައިސާ ހަމަޖައްސައި، ޗައިނާގެ ބަޔަކާ އެކު ސޮއިކުރުމަށް ތައްޔާރު ވަމުން އަންނަ ކަމަށެވެ. މިހާރު މަޝްވަރާ ގޮސްފައިވާ ހިސާބަށް ބަލާއިރު، އަންނަ މަހު އެއްބަސްވުމުގައި ސޮއިކޮށް، އޭގެ ދެ މަސް ދުވަހުގެ ތެރޭގައި އަމަލީ މަސައްކަތް ފެށޭނެ ކަމަށް ވިދާޅުވި އެވެ.

"މީގެ ނަތީޖާއަކަށް ވާނީ އަތޮޅުގެ އަދި މި ސަރަހައްދުގެ މަސްވެރިކަމަށް ބޮޑު ކުރިއެރުމެއް ލިބިގެން ދިއުން. މަސްވެރިކަމުގެ ސިނާއަތަކީ އަޅުގަނޑުމެން އެންމެ އިސްކަންދޭ އެއް ސިނާއަތް. އަޅުގަނޑުމެން އެންމެ ސަމާލުކަންދޭ އެއް އިންޑަސްޓްރީ. ދިވެހިންގެ ލޭ ނާރު. ދިވެހި އެތައް އާއިލާއެއްގެ ދިރިއުޅުން ބިނާވެފައިވާ އިންޑަސްޓްރީ،" މަސްވެރިކަމުގެ ސިނާއަތުގެ މުހިންމުކަން ފާހަގަކުރައްވަމުން ރައީސް ވިދާޅުވި އެވެ.

"އެތައް ސަރުކާރަކުން އެކި ވައުދުތައް ވެ، އެކި އުއްމީދުތައް ދީ، އެކަންކަމުގައި ކުލަ ނުޖެހި ގޮސްފައިވާ ސިނާއަތް."

މަސްވެރިންނަށް ހާއްސަކޮށް ވައުދުތައް ވެވަޑައިގަންނަވަނީ އެކަން ފުއްދުމަށް ކަމަށާއި ވެރިކަމާ ހަވާލުވެވަޑައިގެންނެވިއިރު މަސްވެރިންނަށް ދޭން ޖެހޭ ފައިސާތަކުގެ ބެކްލޮގް އެއްކޮށް ދައްކާފައިވާ ކަމަށް ވެސް ރައީސް ވިދާޅުވި އެވެ. މަސްވެރިންގެ ދުވަސް ކަމަށްވާ މިދިޔަ މަހުގެ 10 އިން ފެށިގެން، މަސްވެރިން ކިތަންމެ ގިނައިން މަސް ކިރުވިޔަސް އޭގެ އަގަށް ވާ ފައިސާ 48 ގަޑިއިރުގެ ތެރޭގައި މިހާރު ދޫކުރަމުން އަންނަ ކަމަށް ވެސް އެ މަނިކުފާނު ވިދާޅުވި އެވެ.