Roadha Mihaaru

ޣައްޒާއިން ނެރޭ މީހުންނަށް އެނބުރި ދިއުމުގެ ހައްގެއް ނޯންނާނެ: ޓްރަމްޕް

ފަލަސްތީނުގެ ޣައްޒާއިން އާންމުން ނެރެ އެތަން އެމެރިކާގެ ބާރުގެ ދަށަށް ގެންދިއުމަށް ގެންގުޅޭ ޕްލޭނުގައި އެތަނުން ނެރޭ އާންމުންނަށް އެނބުރި އެތަނަށް ދިއުމުގެ ހައްގު ނޯންނާނެ ކަމަށް އެމެރިކާގެ ރައީސް ޑޮނަލްޑް ޓްރަޕްމް ވިދާޅުވެއްޖެ އެވެ.

ޣައްޒާއިން ނެރޭ މީހުންނަށް އެނބުރި ނުދެވޭނެ: ޓްރަމްޕް

ފަލަސްތީނުގެ ޣައްޒާއިން އާންމުން ނެރެ އެތަން އެމެރިކާގެ ބާރުގެ ދަށަށް ގެންދިއުމަށް ގެންގުޅޭ ޕްލޭނުގައި އެތަނުން ނެރޭ އާންމުންނަށް އެނބުރި އެތަނަށް ދިއުމުގެ ހައްގު ނޯންނާނެ ކަމަށް އެމެރިކާގެ ރައީސް ޑޮނަލްޑް ޓްރަޕްމް ވިދާޅުވެއްޖެ އެވެ.

ޓްރަމްޕް ފޮކްސް ނިއުސް އަށް ދެއްވި އިންޓަވިއުއެއްގެ ބައެއް ބައިތައް އާންމުކޮށްފައި ވާއިރު އޭގައި ޓްރަމްޕް ވިދާޅުވަނީ ޣައްޒާއަށް އޭނާ ހުށަހެޅުއްވީ "ކުރިމަގުގެ ރިއަލްއެސްޓޭޓް ޑިވެލޮޕްމަންޓް" ޕްލޭނެއް ކަމަށެވެ.

ފޮކްސް ނިއުސް ޗެނަލްގެ ބްރެޓް ބެޔަރަށް ދެއްވި އިންޓަވިއުއެއްގައި ޓްރަމްޕް ވިދާޅުވީ ޣައްޒާ "އަމިއްލަކުރާނަން" ކަމަށާއި މި ޕްލޭންގެ ދަށުން ފަލަސްތީނު މީހުން ޣައްޒާއިން ބޭރުގައި ދިރިއުޅެން ތަފާތު ހަ ތަނެއް ހުންނާނެ ކަމަށެވެ. ޓްރަމްޕް މިހެން ވިދާޅުވިޔަސް، އަރަބި ދުނިޔެ އާއި ބައިނަލްއަގުވާމީ މުޖުތަމައުން ވަނީ ޣައްޒާއިން މީހުން ނެރުމުގެ އެއްވެސް ޕްލޭނަކަށް ތާއީދުނުކުރާނެ ކަމަށާއި އެކަމުގައި އެއްބާރުލުން ވެސް ނުދޭނެ ކަމަށް ބުނެފަ އެވެ.

"ނޫން، އެމީހުންނެއް ނުދާނެ، ސަބަބަކީ އެ މީހުންނަށް މާ ރަނގަޅު ބޯހިޔާވަހިކަމެއް ލިބޭނެތީ،" އިޒްރޭލުން 2023 ވަނަ އަހަރުގެ އޮކްޓޯބަރު މަހުން ފެށިގެން ހަމަލާދީ ސުންނާފަތިކޮށްފައިވާ ޣައްޒާއިން މީހުން ނެރެން ބުނާއިރު އެ މީހުންނަށް އެނބުރި އެތަނަށް ދެވޭނެތޯ ސުވާލުކުރުމުން ޓްރަމްޕް ވިދާޅުވި އެވެ.

"އެހެން ގޮތަކަށް ބުނާ ނަމަ އަޅުގަނޑު މި ދައްކަނީ އެ މީހުންނަށް ދާއިމީ ބޯހިޔާވަހިކަމެއް ހޯދައިދޭ ވާހަކަ. އެއީ އެ މީހުން މިހާރު އެނބުރި ދާން ޖެހޭ ނަމަ، އަދި އެތަނުގައި އުޅެން އެތައް އަހަރެއް ހޭދަވާނެ - އެއީ މީހުންނަށް އުޅެވޭ ގޮތަށް އޮތް ތަނެއް ނޫން."

ޣައްޒާގެ އާންމުން މިސްރާއި އުރުދުން އަށް ގެންގޮސް ޣައްޒާ އަކީ ހިތްފަސޭހަ ރީތި ތަނަކަށް ބަދަލުކޮށްލާނީ ކަމަށް ޓްރަމްޕް ވިދާުޅުވަމުން ދާއިރު ފޮކްސްގެ އިންޓަވިއުގައި ވިދާޅުވީ ޣައްޒާގައި ދެ މިލިއަނެއްހާ މީހުންނަށް، ނުރައްކަލެއް ނެތް ހިސާބުގައ ރީތި އިމާރާތްތަކެއް ހަދައިދޭނެ ކަމަށެވެ.

"އަދި މި ހަދާ ތަނަކީ އަޅުގަނޑުގެ ތަނަކަށް ހަދާނަން. ވިސްނުން ހުރީ ކުރިމަގުގެ ރިއަލްއެސްޓޭޓް ޑިވެލޮޕްމަންޓެއްގެ ގޮތުގައި ކުރިއަށް ގެންދަން. އެއީ ވަރަށް ރީތި ބިންކޮޅަކަށް ވާނެ. މާ ބޮޑު ހަރަދެއް ވެސް ނުދާނެ،" ޓްރަމްޕް ވިދާޅުވި އެވެ.

ޣައްޒާއިން މީހުން ނެރެ އެތަން ތަރައްގީކުރަންވީ ކަމަށް ޓްރަމްޕް ފުރަތަމަ ވިދާޅުވީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާ އެކު ވައިޓްހައުސްގައި ބޭއްވި ބައްދަލުވުމަކަށް ފަހު އެވެ. އެ ޕްލޭނަށް ނަތަންޔާހޫ ވަނީ ވަރަށް ބޮޑަށް ތާއީދުކޮށް އެޔަށްވުރެ ވަކިން މޮޅު ހައްލެއް ނެތް ކަމަށް ބުނެފަ އެވެ. ޓްރަމްޕާއި ނަތަންޔާހޫގެ މި ވާހަކަތަކަށް އިސްލާމީ އަދި އަރަބި ގައުމުތަކުގައި އެހެން ގައުމުތަކުން ވަނީ ވަރަށް ބޮޑަށް ދެކޮޅުހަދައި އެއީ ބައިނަލްއަގުވާމީ ގާނޫނުތަކާ ހިލާފް އަދި ނަސްލު ނައްތާލުމުގެ އަމަލެއް ކަމަށް ބުނެފަ އެވެ.