ޣައްޒާ އަކީ ޓްރަމްޕުގެ ރިސޯޓެއް ގޮތަށް ފެންނަ ވީޑިއޯއެއް އޭނާ އާންމުކޮށްފި

ފަލަސްތީނުގެ ޣައްޒާއިން މީހުން ހުސްކޮށް ތަރައްގީކުރާނެ ކަމަށް ތަކުރާރުކުރަމުން ގެންދާ އެމެރިކާގެ ރައީސް ޑޮނަލްޑް ޓްރަމްޕު، ޣައްޒާ އަކީ ގޮނޑުދޮށުގެ ރިސޯޓެއް ގޮތަށް ފެންނަ ވީޑިއޯއެއް އޭނާގެ ސޯޝަލް މީޑިއާ އެކައުންޓްތަކުގައި ޕޯޓްކޮށްފި އެވެ.

އޭއައި އިން ޖެނެރޭޓް ކޮށްފައިވާ ކަމަށް ބެލެވޭ މި ވީޑިއޯ ޓްރަމްޕުގެ އިންސްޓަގްރާމާއި ޓްރޫތު ސޯޝަލް ނެޓްވޯކްގައި އެތައް މިލިއަން ފަހަރަކު ބަލާފައި ވާއިރު ބައެއް މީހުން ވަނީ އެކައުންޓުތައް ހެކްކޮށްގެން ބަޔަކު ޕޯސްޓްކޮށްފައިވާ ވީޑިއޯއެއްތޯ ވެސް ސުވާލުކޮށްފަ އެވެ.

އެކަމަކު 33 ސިކުންތުގެ އެ ވީޑިއޯއާ މެދު މީހުން ކުރި ސުވާލުތަކަށް ޓްރަމްޕުގެ ޖަވާބެއް ނެތެވެ.

ޓްރަމްޕާއި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ޕޫލެއް ކައިރީގައި ބުއިމެއް ހިފައިގެން ސްވިމް ސޫޓްގައި ތިބޭ މަންޒަރާއި އީލޮން މަސްކް "ފައިސާގެ ވާރޭ" ތެރޭ ނަށާތީ ވެސް ވީޑިއޯގައި ފެނެ އެވެ. އަދި ޓްރަމްޕުގެ ބޮޑު ބުދެއް ވެސް ޣައްޒާގައި ބަހައްޓާފައި ހުންނައިރު، ސިޓީގެ ނަމަކަށް ޖަހާފައި އޮންނަނީ "ޓްރަމްޕް ޣައްޒާ" އެވެ.

ވީޑިއޯގައި "ޑޮނަލްޑް ކަމިން ޓު ސެޓް ޔޫ ފްރީ، ބްރިންގިން ދަ ލައިޓް ފޮ އޯލް ޓު ސީ" އާއި "ފީސްޓް އެންޑް ޑާންސް، ދަ ޑީލް އިޒް ޑަން، ޓްރަމްޕް ގާޒާ ނަމްބަ ވަން" ފަދަ ލަވަތައް ހިމަނާފައިވެ އެވެ.

ޓްރަމްޕް ވަނީ އެމެރިކާގެ މަދަދާ އެކު އިޒްރޭލުން ސުންނާފަތިކޮށްފައިވާ ޣައްޒާގައި ދެން މީހުންނަށް ނޫޅެވޭނެ ކަމަށާއި އެހެންވެ އެތަނުގެ ރައްޔިތުން މިސްރާއި އުރުދުން އަށް ގެންގޮސް، ހިތްފަސޭހަ ރިސޯޓެއްގެ ގޮތުގައި އެތަން ތަރައްގީކުރާނީ ކަމަށް ވިދާޅުވެފަ އެވެ. މި ވާހަކައަށް އިސްލާމީ އަދި އަރަބި ގައުމުތަކުންނާއި އެހެން ގައުމުތަކުން ވެސް ވަރަށް ބޮޑަށް ވަނީ ދެކޮޅުހަދައިފަ އެވެ.