ތިން މީހުންނާއެކު ދަތުރުކުރި ޑިންގީއެއް ގެއްލިގެން ހޯދަނީ

ތިން މީހުންނާއެކު ގދ. ފިޔޯރީން ގއ. ދެއްވަދޫއަށް ދަތުރުކުރި ޑިންގީއެއް ގެއްލިގެން ހޯދަން ފަށައިފި އެވެ.

އެމްއެންޑީއެފްއިން ބުނީ ކަރާ ހިފައިގެން ދަތުރުކުރި އެ ޑިންގީ ގެއްލިގެން އުޅޭކަމުގެ މައުލޫމާތު ލިބުނީ މިއަދުގެ އިރުއޮއްސި 6:12 ހާއިރު ކަމަށެވެ.

އެ ޑިންގީގައި ދަތުރު ކުރަމުން ދިޔައީ ދެ ދިވެހިންނާއި ބިދޭސީއެއް ކަމަށް ވެސް ފުލުހުން ބުންޏެވެ.

އެ މީހުން ދަތުރު ކުރަމުންދިޔަ ޑިންގީ ހޯދުމުގެ މަސައްކަތް ކުރަމުން ދާއިރު، އިއްޔެއިން ފެށިގެން ރާއްޖޭގެ ބޮޑު ބަޔަކަށް އަންނަނީ ވިއްސާރަ ކުރަމުންނެވެ.

ބައެއް ސަރަހައްދުތަކަށް މިއަދު ރީނދޫ އެލާޓް ނެރެފައި ވާއިރު، މިރޭ 8:00 އިން 12:00 އަށް ރ. އަތޮޅުން ފެށިގެން މ. އަތޮޅަށް ވަނީ ރީނދޫ އެލާޓް ނެރެފަ އެވެ. އެ ރަށްތަކަށް ބޯކޮށް ވާރޭ ވެހުމާއެކު މޫސުން ގޯސްވާނެ ކަމަށް ވެސް ލަފާކޮށްފައިވެ އެވެ.