އިމިގްރޭޝަންގެ ވަޒީފާ: ހާހެއްހާ ފޯމުން ޝަރުތު ހަމަވީ 750 މީހުން

އިމިގްރޭޝަންގެ 50 ވަޒީފާ އަށް ހާހެއްހާ އެއްހާ މީހުން ކުރިމަތިލިއިރު އޭގެ ތެރެއިން 750 އެއްހާ މީހުން ޝަރުތު ހަމަވާ ކަމަށް އެ އިދާރާ އިން މިއަދު ބުނެފި އެވެ.

އިމިގްރޭޝަން އޮފިސަރުން ހޯދަން އިއްޔެ ހެނދުނު 9:00 އިން ހަވީރު 5:00 އަށް ގަލޮޅު ސްކޫލުގައި ގެންދިޔަ ވޯން-އިން އިންޓަވިއުއަށް ބޮޑު ކިއޫއެއް ހަދާފައި އޮތެވެ.

އިމިގްރޭޝަންގެ މީޑިއާ އޮފިޝަލަކު ވިދާޅުވީ ވަޒީފާއަށް ހުޅުވާލުމުން 876 މީހުން ކުރިމަތިލި ކަމަށެވެ. އޭގެ ތެރެއިން ޝަރުތު ހަމަވެފައިވަނީ 758 މީހުންނެވެ.

އެ އަށް ފަހު، ނަމްބަރު ދޫކޮށް އިންޓަވިއު ކުރިއަށްގެންދިޔަ ކަމަށް އޭނާ ވިދާޅުވި އެވެ.

އޮފިޝަލް ވިދާޅުވީ ފުރަތަމަ އިންޓަވިއު ގެންދިޔައީ ހަ ޕެނަލަކުން ކަމަށެވެ. އެކަމަކު، ފަހުން 10 ޕެނަލަށް އިތުރުކޮށް ރޭ 12 ޖަހަންދެން އިންޓަވިއު ކުރިއަށް ގެންދިޔަ އެވެ.

އިންޓަވިއުގެ ބައެއްގެ ގޮތުގައި މާދަމާ އަދި ޖެހިގެން އަންނަ އަންގާރަ ދުވަހު އިމްތިހާނު ހަދާނެ އެވެ. އެ ޓެސްޓަށް ފަހު ވަޒީފާ ލިބޭ މީހުންގެ މައުލޫމާތު އިމިގްރޭޝަންގެ ވެބްސައިޓުގައި އާއްމުކުރާނެ ކަމަށް ބުންޏެވެ.