ސައުދުގެ ޝަރީއަތުގެ ފުރަތަމަ އަޑުއެހުން ކެންސަލްކޮށްފި

ވިލިނގިލީ ދާއިރާގެ މެމްބަރު ސައުދު ހުސައިނާއި އެޑިއުކޭޝަންސް މިނިސްޓްރީގެ ކުރީގެ ޑެޕިއުޓީ މިނިސްޓަރު އިބްރާހިމް ހަނީފަށް ކުރާ ޓެރަރިޒަމްގެ ދައުވާގެ ފުރަތަމަ އަޑުއެހުން މިއަދު ކެންސަލްކޮށްފި އެވެ.

ހައި ކޯޓުގެ ފަނޑިޔާރު ޝުޖާއު އުސްމާނު އަވަހާރަކޮށްލަން ރޭވިކަމުގެ ތުހުމަތުގައި ސައުދާއި ހަނީފްގެ މައްޗަށް ކުރަނީ ޓެރަރިޒަމްގެ އަމަލެއް ހިންގަން ރޭވުމުގެ ދައުވާ އެވެ. އެ މައްސަލާގައި ކްރިމިނަލް ކޯޓުގައި މިއަދު ބާއްވަން އޮތީ ފުރަތަމަ އަޑުއެހުމެވެ.

މިއަދުގެ އަޑުއެހުން ކެންސަލް ކުރީ ކޯޓަށް ހާޒިރުވުމުގެ އަމުރު ސައުދާ ހަވާލުކޮށްފައި ނެތުމުން ކަމަށް ކްރިމިނަލް ކޯޓުން ބުންޏެވެ. އެ މައްސަލާގެ އަޑުއެހުމެއް ދެން އޮންނާނެ ދުވަހެއްް އަދި ސާފެއް ނުވެ އެވެ.

ސައުދާއި ހަނީފްގެ މައްޗަށް ޓެރަރިޒަމްގެ ދައުވާ ސާބިތުވެއްޖެ ނަމަ 17 އަހަރާއި 20 އަހަރާ ދެމެދުގެ ޖަލު ހުކުމެއް އަންނާނެ އެވެ.

އެ މައްސަލައިގެ އިތުރުން އެހެން ދެ ދައުވާއެއް ވެސް ސައުދުގެ މައްޗަށް ދައުލަތުން ކުރެ އެވެ. އެއީ މިދިޔަ މެއި މަހުގެ 24 ވަނަ ދުވަހު ގަދަކަމުން މަޖިލީހުގެ އިދާރާ އަށް ވަން މައްސަލާގައި ކުރާ ދައުވާއަކާއި ސައުދުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމާފައި ވަނިކޮށް އެ ދުވަހު ސައުދު މަޖިލީހަށް ވަން މައްސަލާގައި ކުރާ ދައުވާ އެކެވެ. އެކަމަކު އެ ދެ މައްސަލައިގެ ޝަރީއަތެއް އަދި ނުފަށަ އެވެ.

ސައުދުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމި މައްސަލަ މިހާރު އޮތީ ސުޕްރީމް ކޯޓުގައި ހުކުމް ކުރުމުގެ މަރުހަލާގަ އެވެ.