"ކުއޯ"ގެ އޮފީހެއް ރާއްޖޭގައި ހުޅުވައިފި

ޓޫރިޒަމަށް ހާއްސަ ބްރޭންޑިންގެ ހިދުމަތް ދޭ ކުންފުނި "ކުއޯ" ގެ އޮފީހެއް ރާއްޖޭގައި ހުޅުވައިފި އެވެ.

ކުއޯ މާލެ އޮފީސް ހުޅުވާފައި ވަނީ ޓޫރިޒަމް މަޖައްލާ "ހޮޓެލިއާ މޯލްޑިވްސް" ނެރޭ ޕާސްޕެކްޓިވް ކުންފުންޏާ ގުޅިގެންނެވެ.

ޕާސްޕެކްޓިވް ކުންފުނިން ބުނި ގޮތުގައި މި އޮފީހުގައި ޓޫރިޒަމްގެ ސިނާއަތަށް ހާއްސަ ހިދުމަތްތައް ފޯރުކޮށްދޭނެ އެވެ. އެގޮތުން ބްރޭންޑް ސްޓްރެޓަޖީ އަދި އެމްޕްލިކޭޝަން، ކޯޕަރޭޓް އައިޑެންޓިޓީ، ކްރިއޭޓިވް ޑިޒައިން، ކޮންޓްރެކްޓް އަދި ވީޑިއޯ އުފެއްދުން ފަދަ ހިދުމަތްތައް ހިމެނެ އެވެ.

އެ ކުންފުނިން ބުނީ މާލޭގައި ރާއްޖޭގެ ޓޫރިޒަމް ދާއިރާއަށް ބޭނުންވެފައިވާ ގިނަ ހިދުމަތްތަކެއް ކުއޯގެ އޮފީހެއް ގާއިމުކުރުމުން ފަސޭހަކަމާ އެކު ފޯރުކޮށްދެވޭނެ ކަމަށެވެ.

"ކުއޯ އިން ގެނެސްދެނީ ބައިނަލްއަގްވާމީ ބްރޭންޑިން ތަޖުރިބާ. ޕާސްޕެކްޓިވް އިން ފޯރުކޮށްދެނީ ރާއްޖޭގެ ޓޫރިޒަމާ ބެހޭ މައުލޫމާތާއި ޕަބްލިޝިންގެ ތަޖުރިބާ. އެހެންވެ މި ދެ ކުންފުނި ގުޅުމުގެ ސަބަބުން ރާއްޖޭގެ ޓޫރިޒަމް ދާއިރާ އިތުރަށް ވަރުގަދަ ވާނެ،" ޕާސްޕެކްޓިވް އިން ބުންޏެވެ.

މި އޮފީސް ހުޅުވުމާ ގުޅިގެން ކުއޯގެ ސީއީއޯ ޑޭވިޑް ކީން ވިދާޅުވީ މިއީ ރާއްޖޭގެ ޓޫރިޒަމަށް ބަދަލުތަކެއް އަންނަމުންދާ ދަނޑިވަޅެއް ކަމަށާއި ރާއްޖެ އަންނަ ޓޫރިސްޓުން ވެސް ބަަދަލުވަމުން ދާ ކަމަށެވެ. އަދި މި ބަދަލާ އެއްގޮތަށް މި ދާއިރާގައި ހަރަކާތްތެރިވާ ފަރާތްތަކުން ވިސްނުން ބަދަލު ކޮށް، ޓޫރުސްޓުންނަށް ރާއްޖެ ސިފަކުރެވޭ ގޮތް ބަދަލުކުރަން ރާއްޖޭގެ ސަގާފަތާއި އާދަކާދައިގެ ތަޖުރިބާތައް އެމީހުންނަށް ދައްކައިދޭން ޖެހޭ ކަމަށް ވިދާޅުވެފައިވެ އެވެ.

"ކުއޯގެ ބްރޭންޑިން ތަޖުރިބާގެ އިތުރުން މުހިންމު ގުޅުންތައް އެކުލެވޭ ވިއުގަތަކާއި ތަޖުރިބާކާރު ޓީމުގެ ޒަރިއްޔާއިން ރާއްޖޭގެ ރިސޯޓުތަކާއި ހޮޓެލްތަކަށް ބައިނަލްއަގްވާމީ ފެންވަރުގެ ހިދުމަތެއް ހޯދުމުގެ ފުރުސަތު މިހާރު މިވަނީ ފަހި ވެފައި،" ޕާސްޕެކްޓިވްގެ މެނޭޖިން ޑިރެކްޓަރު މުހައްމަދު މަމްދޫހު ވިދާޅުވި އެވެ.

ކުއޯ އިން ވަނީ މީގެ ކުރިން ވެސް ރާއްޖޭގެ ބޮޑެތި ބައެއް ރިސޯޓް ބްރޭންޑުތައް އުފެއްދުމުގައި އެހީތެރިކަން ފޯރުކޮށްދީފަ އެވެ. އޭގެ ތެރޭގައި ޕާ އަކުއާ ހުވަފެންފުށި، ބަރޮސް، ވެލައްސަރު އަދި ސަން ސިޔާމް އިރުފުށި ފަދަ ރިސޯޓުތައް ހިމެނެ އެވެ.