އީރާނާ ސުލްހަވާން އެމެރިކާ އޮތީ ތައްޔާރަށް: ޓްރަމްޕް

ތެހެރާން (ޖެނުއަރީ 8) - އެމެރިކާ ސިފައިން އިރާގުގައި ތިބޭ ދެ މަރުކަޒަކަށް އަމާޒުކޮށް އީރާނުން މިއަަދު މިސައިލް ހަމަލާދީފި އެވެ.

އީރާނުގެ ރަސްމީ ޓީވީން ބުނީ އެއީ އެ ގައުމުގެ ގުދުސް ފޯސްގެ ކޮމާންޑަރު ގާސިމް ސުލައިމާނީ އަވަހާރަކޮށްލުމުގެ ބަދަލު ހިފަން ދިން ހަމަލާތަކެއް ކަމަށެވެ. އީރާނުގެ ހަމަލާތަކުގައި އެމެރިކާ ސިފައިންގެ ތެރޭން މީހަކު މަރުވި ކަމެއް އަދި ޔަގީނެއް ނޫނެވެ.

ޕެންޓަގަނުން ބުނީ އިރާގުގެ އިރްބިލް އާއި އަލް އަސަދުގެ ވައިގެ މަރުކަޒަކަށް ހަމަލާދީފައިވާ ކަމަށެވެ.

"އީރާނުން ދިން ހަމަލާގެ މައުލޫމާތު ރައީސް ޑޮނަލްޑް ޓްރަމްޕަށް އަރުވާފައި ވަނީ. އަދި ގައުމީ ސަލާމަތާ ބެހޭ ޓީމާ އެކު މަޝްވަރާ ކުރަމުން ދަނީ،" ވައިޓް ހައުސްގެ ތަރުޖަމާން ސްޓެފާނީ ގްރިޝަމް ވިދާޅުވި އެވެ.

ޕެންޓަގަނުން ބުނީ މިސައިލަ ހަމަލާގައި ލިބުނު ގެއްލުންތައް ބަލަމުންދާ ކަމަށެވެ.

އީރާނުގެ ރިވޮލިއުޝަނަރީ ގާޑުން ވަނީ އެމެރިކާ ސިފައިން ތިބޭ ގައުމުތަކަށް ވެސް އިންޒާރު ދީފަ އެވެ.

"އެމެރިކާ ސިފައިންނަށް މަދަދު ދޭ ގައުމުތަކަށް މި އިންޒާރު ކުރަނީ އީރާނާ ދެކޮޅަށް އެމެރިކާ ސިފައިން ހަމަލާ ދޭން އެހީވާ ކޮންމެ ގައުމަކަށް އީރާނުން ހަމަލާ ދޭނެކަން،" ރިވޮލިއުޝަނަރީ ގާޑުގެ ބަޔާނުގައި ބުނެފައިވެ އެވެ.

އީރާނުުގެ ޚާރިޖީ ވަޒީރު ޖަވާދު ޒަރީފް ނެރުއްވި ޓްވިޓާ މެސެޖެއްގައި ވިދާޅުވީ އެއީ އީރާނުގެ އަމިއްލަ ދިފާއުގައި ދިން ހަމަލާއެއް ކަމަށާއި އެމެރިކާއާ އެކު ކުރިމަތިލުމަކަށް ދާން ބޭނުން ނުވާ ކަމަށެވެ.

އީރާނުގެ މިސައިލް ހަމަލާތަކަށް ފަހު ރައީސް ޑޮނަލްޑް ޓްރަމްޕް ކުރެއްވި ޓްވީޓެއްގައި ވިދާޅުވީ މިސައިލް ހަމަލާގައި ލިބުނު ގެއްލުން ބަލާފައިވާ ކަމަށާއި ހުރިހާ ކަމެއް ވެސް ރަނގަޅު ކަމަށެވެ.

އިރާގުގައި އެމެރިކާގެ 5،200 ސިފައިން ތިބެ އެވެ.