ފައްޅި ކުރިމަތީ ޓްރަމްޕް ފޮޓޯއަކަށް ހުއްޓިވަޑައިގަތީ މުޒާހަރާ އަށް ބިރުނުގަންނަކަން ދައްކާލަން

ވޮޝިންޓަން (ޖޫން 3) - އެމެރިކާގެ ކަޅު ނަސްލުގެ މީހެއް ކަމަށްވާ ޖޯޖް ފްލޮއިޑް ފުލުހުން ހައްޔަރު ކުރަން އުޅުމުގެ ތެރޭގައި އޭނާ މަރުވުމުން މުޅި އެމެރިކާގައި ފެށި މުޒާހަރާތައް ވައިޓް ހައުސްގެ ބޭރުގައި ވެސް ވަރުގަދަ ކުރުމުން ރައްކާތެރި ކަމުގެ ފިޔަވަޅެއްގެ ގޮތުން ރައީސް ޑޮނަލްޑް ޓްރަމްޕް ބިމު އަޑީގެ ކޮޓަރިއަކަށްލި ވާހަކަ ނޫސްތަކުގައި ޖެހުމުން ޓްރަމްޕް ވަރަށް ބޮޑަށް ކޯފާ އިސްކުރެއްވި ކަމަށް ބައެއް މީހުން ބުނެފައިވެ އެވެ.

އެހެންވެ ޓްރަމްޕް ވަނީ މުޒާހަރާ އަށް ބިރުނުގަންނަކަން ދައްކާލުމުގެ ފޮޓޯ އިވެންޓެއް ބާއްވާލާފައި ކަމަށް ރިޕޯޓްތައް ބުނެ އެވެ. އެކަމަކު ވައިޓް ހައުސް އިން ބޭރަށް ހިންގަވާފައި ނުކުމެވަޑައިގެން ޕެންސިލްވޭނިއާ އެވެނިއު ހުރަސް ކުރައްވާ ފައްޅި އަށް ވަޑައިގަތުމުގެ ކުރިން ފުލުހުން ވަނީ އެ ސަރަހައްދުގައި މުޒާހަރާ ކުރި އެންމެން އެ ތަނުން ފޮނުވާލައިފަ އެވެ. ސުލްހަވެރިކަމާ އެކު މުޒާހަރާ ކުރި މީހުން ބޭރުކުރަން ފުލުހުން ވަނީ ކަރުނަ ގޭހާއި ރަބަރު ވަޒަން ބޭނުންކޮށްފަ އެވެ.

އިވެންޓުގެ ކުރިން ވައިޓް ހައުސްގެ ރޯޒް ގާޑަންގައި ވާހަކަ ދައްކަވަމުން ޓްރަމްޕް ވަނީ އެމަނިކުފާނަކީ ސުލްހަވެރި މުޒާހަރާތަކަށް ތާއީދުކުރައްވާ ބޭފުޅެއް ކަމަށް ވިދާޅުވެފަ އެވެ. ޕްރެސް ބްރީފިން ނިންމަވާލައްވަމުން ޓްރަމްޕް ވަނީ މުހިންމު ތަނަކަށް ވަޑައިގަންނަވަނީ ކަމަށް ވިދާޅުވެފަ އެވެ. އެއަށް ފަހު ވައިޓް ހައުސް އިން ނުކުމެވަޑައިގެން ހިންގަވާފައި ސެއިންޓް ޖޯންސް އެޕިސްކޮޕާލް ފައްޅި އަށް ވަޑައިގެން އެ ތަނުގެ ބޭރުގައި ބައިބަލްއެއް ހިއްޕަވައިގެން، ފޮޓޯ އަކަށް ހުއްޓިވަޑައިގަތެވެ.

ފައްޅިން ވައިޓް ހައުސް އަށް ވަޑައިގެންނެވީ ވެސް ސީކްރެޓް ސާވިސް އެޖެންޓުންނާ އެކު ހިންގަވައިފަ އެވެ.