އައްޑޫ ފްލައިން ސްކޫލުގެ ކިޔެވުން އަލުން ފަށައިފި

އައްޑޫގައި ހިންގާ އެވިޑް ސްކޫލް އޮފް އޭވިއޭޝަން (އަސާ)ގެ ކިޔެވުން އަލުން ފަށައިފި އެވެ.

ދިގު މުއްދަތަކަށް ފަހު ފްލައިން ސްކޫލުގެ ކިޔެވުން މި މަހު ފަށާފައި މިވަނީ، ސްކޫލުގެ ހުރިހާ ކަމެއް އެވިޑް ކޮލެޖުގެ ދަށަށް މިދިޔަ މަހު ބަދަލު ކުރުމަށް ފަހު އެވެ.

އެވިޑުން ބުނީ، އެ ސްކޫލުގައި މިހާރު ކިޔަވަމުން ގެންދާ ދަރިވަރުންނަށް ހިންގާ ސިމިއުލޭޓަ ޓްރެއިނިންތައް މިއަދު އަލުން ފަށާފައިވާ ކަމަށެވެ. މީގެ އިތުރުން މީގެ ހަފްތާއެއް ކުރިން ގްރައުންޑް ކްލާސްތަކުގެ ތިއަރީބައި ފުރިހަމަ ކުރަންޖެހޭ ދަރިވަރުންގެ ކްލާސްތައް ފަށާފައިވާ ކަމަށާއި، އިމްތިހާނު ހަދަން ޖެހޭ ކުދިން އެކަމަށް ތައްޔާރު ކުރުމަށް ރިފްރެޝާ ކްލާސްތައް ވެސް ފަށާފައިވާ ކަމަށް އެވިޑުން ބުންޏެވެ.

މި ކްލާސްތަކުގެ ތެރެއިން ރިފްރެޝާ ކްލާސްތައް ކުރިއަށް ގެންދަނީ ދަރިވަރުންގެ އަތުން އެއްވެސް ފީއެއް ނުނަގަ އެވެ. އަދި އެ ކްލާސްތައް ނިމުމުން އިމްތިހާނު ޝެޑިއުލް ތައްޔާރު ކުރުމަށް ފަހު، ސިވިލް އޭވިއޭޝަންގެ އިރުޝާދުގެ ދަށުން އިމްތިހާނުގެ ކަންކަން ކުރިއަށް ގެންދިއުމަށް ނިންމާފައިވާ ކަމަށް ވެސް އެވިޑުން ބުނެ އެވެ.

ކްލާސްތައް ފެށުމުގެ އިތުރުން އެ ސްކޫލަށް އަލަށް ގެނައުމަށް ހަމަޖައްސާފައިވާ ފްލައިޓުގެ ޕޭމަންޓުގެ ކަންކަން މިހާރު ހަމަޖެހިފައިވާ ކަމަށް އެވިޑުން ބުނެ އެވެ.

ސްކޫލުގެ ކަންކަން މިހާރު ކުރިއަށްދާ ގޮތް ބައްލަވާލެއްވުމަށް އެވިޑް ކޮލެޖުގެ ޗެއާމަން އަބްދުﷲ މުސްތާގް ރަޝާދު މި ވަގުތު ހުންނެވީ އައްޑޫގަ އެވެ.

އައްޑޫ ފްލައިން ސްކޫލް ހިންގަމުން އަންނަ އިމާރާތް ހުސްކުރުމަށް އައްޑޫ އިންޓަނޭޝަނަލް އެއާޕޯޓު (އޭއައިއޭ) އިން ނޯޓިސް ފޮނުވާފައިވަނީ މި މަހުގެ ނިޔަލަށެވެ. "މިހާރު" އަށް ކުރިން ދެއްވި އިންޓަވިއުއެއްގައި މުސްތާގް ވިދާޅުވީ ސްކޫލް ހިންގާނެ އެހެން ތަނެއް ހޯދުމަށް މަސައްކަތް ކުރާ ކަމަށެވެ.