ރޯހިތަށް ރާއްޖޭން ދިމާވީ ހީނާއާ

އިންޑިއާގެ އެކްޓަރު ރޯހިތު ރޯއި ރާއްޖޭގައި ޗުއްޓީ ހޭދަކުރަމުން އަންނަނިކޮށް، އޭނާ ހުރި ރިސޯޓުން އިންޑިއާގެ ބަތަލާ ހީނާ ޚާނާ ދިމާވެގެން އެކުގައި ފޮޓޯ ނަގައި އިންސްޓަގްރާމްގައި އެ ވާހަކަ ބުނެފި އެވެ.

ވެލައްސަރު ރިސޯޓުން ހީނާއާ ދިމާވުމުން ނެގި ފޮޓޯގެ ކެޕްޝަނުގައި ބުނެފައި އޮތީ މި އުޅެވެނީ ކުޑަކުޑަ ދުނިޔެއެއްގައި ކަމަށެވެ. މީގެ އިތުރުން ހީނާއާ އެކު ނަގާފައިވާ ވީޑިއޯއެއް ވެސް ޕޯސްޓްކޮށްފައިވެ އެވެ.

ޓީވީ ސިލްސިލާ "ޔޭ ރިޝްތާ ކިޔާ ކެހެލާ ތާ ހޭ" އިން ވިދާލި ހީނާ އަކީ މިހާރު ޗުއްޓީއަށް ރާއްޖެ އެންމެ ގިނައިން އަންނަ އިންޑިއާގެ ސެލެބްރިޓީންގެ ތެރެއިން އެކަކެވެ. މިދިޔަ އަހަރު ފިލްމު "ހެކްޑް" އިން ބޮލީވުޑަށް ވެސް ނުކުމެފައިވާ ބަތަލާގެ މި ފަހަރުގެ ރާއްޖެ ދަތުރުގެ ބައެއް ފޮޓޯތައް ވެސް ސޯޝަލް މީޑިއާގައި ޕޯސްޓްކޮށްފައިވެ އެވެ.

ރޯހިތާއި އަންހެނުން ކުރީގެ ޓީވީ ބަތަލާ މާންސީ ޖޯޝީގެ ރާއްޖެ ދަތުރުގެ ގިނަ ފޮޓޯތަކެއް އިންސްޓަގްރާމްގައި ޕޯސްޓްކޮށްފައިވެ އެވެ. ރޯހިތަކީ ސްޓާ ޕްލަސްގެ ކުރީގެ މަގުބޫލު ސިލްސިލާ "ކަސޯޓީ ޒިންދަގީ ކޭ" ގައި ބަޖާޖްގެ ރޯލު ކުޅެގެން މަޝްހޫރުވި ރޯނިތު ރޯއިގެ ކޮއްކޮ އެވެ.

ރޯހިތު، 52، އަކީ އާންމުކޮށް ބޮލީވުޑްގެ ފިލްމުތަކުގެ ސަޕޯޓިން ރޯލުތަކުން ފެންނަ އެކްޓަރެކެވެ. އޭނާގެ އެންމެ ފަހުގެ ފިލްމަކީ މާޗްގައި ރިލީޒްކުރި ޖޯން އަބްރަހަމާއި އިމްރާން ހާޝިމީގެ "މުމްބާއީ ސާގާ" އެވެ.