އަލީ ވަހީދު ގެންނަން އަސްހަދަށް ދިން މުއްދަތު ހަމަވެއްޖެ

ކޯޓަށް ހާޒިރުނުވެ ރާއްޖެއިން ބޭރުގައި އުޅުއްވާ ކުރީގެ ޓޫރިޒަމް މިނިސްޓަރު އަލީ ވަހީދު ކްރިމިނަލް ކޯޓަށް ހާޒިރު ކުރުމަށް ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ (އަޑުބަރޭ) އަށް ކޯޓުން ދިން 72 ގަޑިއިރުގެ މުއްދަތު އިއްޔެ ހަމަވެއްޖެ އެވެ.

އަލީ ވަހީދުގެ ބަދަލުގައި ކޯޓުގައި ޖާމިނުވެ އަސްހަދު އެއްބަސްވެފައި ވަނީ އަލީ ވަހީދު ބޭސްފަރުވާއަށް ފުރާތާ ހަތަރު މަސް ތެރޭ އޭނާ އަނބުރާ ރާއްޖެއަށް ގެނައުމަށެވެ. އެކަމަކު، އެ މުއްދަތުގައި އޭނާ ގެނެވިފައި ނުވާތީ އަސްހަދަށް ފިޔަވަޅު އަޅަން މީގެ ކުރިން ވެސް ދައުލަތުން އެދިފައިވެ އެވެ.

މިދިޔަ އާދީއްތަ ދުވަހު ކްރިމިނަލް ކޯޓުގައި ބޭއްވި އަލީ ވަހީދުގެ މައްސަލައިގެ އަޑުއެހުމަށް އަސްހަދު ހާޒިރުކުރި އެވެ. އަލީ ވަހީދުގެ ވަކީލުން ވެސް ވަޑައިގެންނެވި އެ އަޑުއެހުމުގައި މައްސަލަ ބެއްލެވި ގާޒީ ހަސަން ސައީދު އެންގެވީ އަލީ ވަހީދު 72 ގަޑިއިރު ތެރޭ ރާއްޖެއަށް ނުގެނެސްފި ނަމަ އަސްހަދަށް ފިޔަވަޅު އަޅުއްވާނެ ކަމަށެވެ.

އަސްހަދަށް ދިން މުއްދަތު ހަމަވެފައިވާއިރު، މިހާތަނަށް އަސްހަދަށް ފިޔަވަޅު އަޅަން އަޑުއެހުމެއް ނުބާއްވަ އެވެ. ކޯޓުން ދިން މުއްދަތުގައި އަސްހަދަށް އަލީ ވަހީދު ހާޒިރު ނުކުރެވުނަސް، ވަގުތުން ވަގުތަށް ފިޔަވަޅު އަޅާކަށް މަޖުބޫރެއް ނޫނެވެ.

ކްރިމިނަލް ކޯޓުގެ ރަޖިސްޓްރާ "މިހާރު" އަށް ވިދާޅުވީ، އަސްހަދަށް ފިޔަވަޅެއް އަޅާ ނަމަ އަޅާނީ ކްރިމިނަލް ކޯޓުގައި އެކަމަށް އަޑުއެހުމެއް ތާވަލު ކުރުމަށްފަހުގައި ކަމަށެވެ.

އިއްޔެ ވެސް މިއަދު ވެސް އެ މައްސަލައިގެ އަޑުއެހުމެއް އަދި ތާވަލެއް ނުކުރެ އެވެ. އެނގިފައިވާ ގޮތުގައި މައްސަލަ ބައްލަވާ ގާޒީ ހަސަން ސައީދު މިވަގުތު ހުންނެވީ ޗުއްޓީގަ އެވެ.

އަސްހަދަށް ވެސް އަލީ ވަހީދު ރާއްޖެއަށް ގެނެވިފައި ނުވާއިރު ކްރިމިނަލް ކޯޓުން މިހާރު ވަނީ އޭނާ ހައްޔަރުކޮށްގެން ކޯޓަށް ހާޒިރުކުރުމުގެ އަމުރެއް ފުލުހުންގެ މައްޗަށް ނެރެފަ އެވެ. އަދި ފުލުހުން މިހާރު ގެންދަނީ އޭނާ ހޯދަން އިންޓަޕޮލް ރެޑް ނޯޓިސް ހޯދަން އިންޓަޕޯލްއަށް ހުށަހެޅުމުގެ މަސައްކަތް ވެސް ކުރަމުންނެވެ.

މީހަކު ޖާމިނު ކޮށްފައި ދޫކުރާ އިރު ކޯޓުން ކުރާ ޝަރުތުތަކާ ހިލާފުވެއްޖެ ނަމަ، ޖާމިނުވި މީހާއާ ދެކޮޅަށް ފިޔަވަޅު އެޅޭނެ އެވެ. އެގޮތުން އެއް އަހަރަށް ވުރެ ދިގު ނޫން މުއްދަތަކަށް ޖަލަށްލުން ނުވަތަ ގިނަވެގެން ދެ އަހަރަށް ގޭގައި ބަންދު ކުރުން ނުވަތަ 15،000ރ. އަށް ވުރެ ބޮޑު ނޫން އަދަދަކުން ޖޫރިމަނާ ކުރެވިދާނެ ކަމަށް ޖިނާއީ އިޖުރާއަތުގެ ގާނޫނުގައިވެ އެވެ. އަސްހަދުގެ މައްސަލައިގައި ދައުލަތުން އެދިފައި ވަނީ އޭނާ އެއް އަހަރަށް ޖަލަށް ލުމަށެވެ.

މިކަމުގައި އަސްހަދުގެ ބަހެއް ނުލިބުނެވެ.

އެއްބަސްވި މުއްދަތުގައި އަލީ ވަހީދު ރާއްޖެ ވަޑައިނުގަތަސް ކްރިމިނަލް ކޯޓުން މީގެ ކުރިން ވަނީ އޭނާއަށް ރާއްޖެއިން ބޭރުގައި ހުންނަވައިގެން އޮންލައިންކޮށް އަޑުއެހުމުގައި ބައިވެރިވެވޭނެ ގޮތް ހަމަޖައްސައިދީފަ އެވެ. މި ނިންމުން ދައުލަތުން މިހާރު ސުޕްރީމް ކޯޓުގައި އިސްތިއުނާފުކޮށްފައިވާއިރު، ސުޕްރީމް ކޯޓުން ވަނީ އެ މައްސަލަ ބަލައި ނިމެންދެން އޮންލައިންކޮށް ޝަރީއަތް ނުބާއްވަން އަންގައި ވަގުތީ އަމުރެއް ނެރެފަ އެވެ.

ސުޕްރީމް ކޯޓުން އެ މައްސަލައިގެ އަޑުއެހުމަކަށް އަލީ ވަހީދަށް ޗިޓު ފޮނުމުން އޭނާ ކޯޓަށް ވަޑައިގެންފައި ނުވާތީ އެއީ އެ ކޯޓުގެ ހުރުމަތް ކެނޑުން ކަމަށް ބަލައި އޭނާ ދެ މަހަށް ޖަލަށް ލާން ވެސް ހުކުމް ވަނީ ހުކުމްކޮށްފަ އެވެ.