ހުކުމްކުރިއިރު އަޑުބަރޭ ރާއްޖެއަކު ނެތް، ހޯދައިދޭން ޕޮލިހުގައި އެދިއްޖެ

ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެ އިން ބޭރަށް ވަޑައިގަތުމަށް ޖާމިނުވި ޔޫތު މިނިސްޓްރީގެ ކުރީގެ ސްޓޭޓް މިނިސްޓަރު އަސްހަދު އަލީ (އަޑުބަރޭ)އަށް އިއްވި ހުކުމް ތަންފީޒުކުރަން އޭނާ ހަވާލުކޮށްދޭން މޯލްޑިވްސް ކަރެކްޝަނަލް ސާވިސް އިން ފުލުސް އޮފީހުގައި މިއަދު އެދިއްޖެ އެވެ.

އަޑުބަރޭ އަށް ކްރިމިނަލް ކޯޓުން މިއަދު 15 ދުވަހުގެ ޖަލު ހުކުމެއް އިއްވީ އޭނާގެ ޣައިރު ހާޒިރުގަ އެވެ. އޭނާ މިވަގުތު ހުންނެވީ އެނގިފައިވާ ގޮތުގައި ރާއްޖެ އިން ބޭރުގަ އެވެ.

އަޑުބަރޭ އަށް ޖަލު ހުކުމެއް އައީ ޖިންސީ ގޯނާ އާއި ރޭޕްގެ ދައުވާތަކެއް އުފުލައި ޝަރީއަތް ފަށާފައި ވަނިކޮށް އަލީ ވަހީދު ބޭސްފަރުވާ އަށް ރާއްޖެ އިން ބޭރަށްދާން ޖާމިނުވުމަށް ފަހު އޭނާ ޝަރީއަތަށް ހާޒިރުކޮށްދީފައި ނުވާތީ އެވެ.

ކަރެކްޝަންސްގެ މީޑިއާ އޮފިޝަލް އަހްމަދު ނަސީމް "މިހާރު"އަށް ވިދާޅުވީ ޣައިރު ހާޒިރުގައި އަސްހަދަށް ކުރި ހުކުމާ ގުޅިގެން ހުކުމް ތަންފީޒުކުރަން އޭނާ ގެނެސްދޭން ފުލުސް އޮފީހުގައި އެދިފައިވާ ކަމަށެވެ.

ކޯޓުން މިއަދު ކުރި ހުކުމުގައި ވަނީ އަލީ ވަހީދު ގެންނަން އަޑުބަރޭ ކުރި މަސައްކަތެއް އެނގެން ނެތް ކަމަށެވެ. އަދި 72 ގަޑިއިރުގެ ތެރޭގައި އަލީ ވަހީދު ރާއްޖެ ނުގެނައުމަކީ ކޯޓުގެ އެންގުމަކާ ޚިލާފުވެ، ކޯޓުގެ ހުރުމަތް ކެނޑުން ކަމަށް ގާޒީ ހަސަން ސައީދު ވިދާޅުވި އެވެ.

މި ހުކުމާ އެކު އަޑުބަރޭ ސްޓޭޓް މިނިސްޓަރު ކަމުގެ މަގާމުން މިއަދު ވަނީ ވަކިކޮށްފަ އެވެ.

ގާޒީ ހަސަން ވިދާޅުވީ، އަލީ ވަހީދާ ދެކޮޅަށް ދައުލަތުން އިސްތިއުނާފް ކޮށްފައިވާ މައްސަލަތައް ވެސް ކުރިއަށް ނުގެންދެވި އޮތީ އޭނާ ރާއްޖެ ވަޑައިނުގަތުމުން ކަމަށް ވާއިރު، އެކަމުގައި ވެސް އަޑުބަރޭގެ އިހުމާލު އެބައޮތް ކަމަށެވެ. އަދި އަލީ ވަހީދު ރާއްޖެ ވަޑައިނުގެން، ބޭރުގައި ހުންނަވަނީ އަޑުބަރޭގެ އެހީތެރިކަމާ އެކު ކަމަށް ގަބޫލު ކުރެވޭ ކަމަށް ގާޒީ ވިދާޅުވި އެވެ. އެހެންވެ، ކޯޓުގެ ހުރުމަތް ރައްކާތެރި ކުރުމުގެ ގަވާއިދާ ހަވާލާދީ ކޯޓުގެެ ހުރުމަތް ކެނޑުމުގެ އަދަބެއްގެ ގޮތުން ޖިނާއީ އިޖްރައާތުގެ ގާނޫނުގެ ދަށުން އަޑުބަރޭ 15 ދުވަހަށް ޖަލަށްލާން ހުކުމްކުރީ ކަމަށް ގާޒީ ވިދާޅުވި އެވެ.

އަޑުބަރޭ 15 ދުވަހަށް ޖަލަށްލިއިރު، ޖިނާއީ އިޖްރައާތުގެ ގާނޫނުގައި ޖާމިނުވުމުގެ އިގްރާރާ ޚިލާފްވުމުގެ އަދަބެއްގެ ގޮތުން އެއް އަހަރަށް ޖަލަށްލުމުގެ ފުރުސަތު ވެސް އޮވެ އެވެ. އެކަމަކު ގާޒީ ނިންމެވީ އަޑުބަރޭގެ އެ އަމަލަކީ ކޯޓުގެ ހުރުމަތް ކެނޑުމުގެ ކުށެއް ކަމަށެވެ. އަދި ކޯޓުގެ ހުރުމަތް ކެނޑުމުގެ ކުށަށް ޖިނާއީ އިޖްރައާތުގެ ގާނޫނުގައި އޮންނަނީ ގިނަވެގެން 15 ދުވަހަށް ޖަލަށްލުން ނުވަތަ އެއް މަހަށް ގޭގައި ބަންދު ކުރުމެވެ.

އަލީ ވަހީދު މިހާތަނަށް ވެސް ރާއްޖެ ގެނެސްފައި ނުވާއިރު، އޭނާއާ ދެކޮޅަށް ސުޕްރީމް ކޯޓުގައި އިސްތިއުނާފްކުރި މައްސަލާގެ އަޑުއެހުމަށް ހާޒިރު ނުވުމުން އޭނާގެ މައްޗަށް ވެސް ދެ މަހުގެ ޖަލު ހުކުމެއް ސުޕްރީމް ކޯޓުން ކުރިން އޮތީ އިއްވައިފަ އެވެ.