ޕީޕީއެމްގެ މެންބަރުން މަދުވި މައްސަލާގައި އީސީން ރަޖިސްޓްރޭޝަންގެ އޮޑިޓެއް ހަދަނީ

އިދިކޮޅު ޕީޕީއެމްގެ ގިނަ މެމްބަރުންތަކެއް، އޮޅުވާލައިގެން އެހެން ޕާޓީތަކަށް ވައްދާފައިވާ ކަމަށް ބުނެ ކޮށްފައިވާ ޝަކުވާތަކާ ހެދި އިލެކްޝަން ކޮމިޝަން (އީސީ) ގެ ރަޖިސްރޭޝަން ސެކްޝަންގެ އޮޑިޓެއް ހަދަން ނިންމައިފި އެވެ.

އެ ކޮމިޝަންގެ ރައީސް ފުއާދު ތައުފީގު ވިދާޅުވީ މިިދިޔަ ބުރާސްފަތި ދުވަހު ޕީޕީއެމާ އެކު ސިޔާސީ ޕާޓީތަކާ ބައްދަލުކުރުމުން ޕާޓީން ގިނަ މެމްބަރުންތަކެެއް މަދުވެފައިވާ ކަމުގެ ޝަކުވާ ކޮށްފައިވާ ކަމަށެވެ. އެ މައްސަލައިގައި މާދަމާ ވެސް އެ ޕާޓީއާ ވަކިން ބައްދަލުކުރާނެ ކަމަށް ފުއާދު ވިދާޅުވި އެވެ.

ޕީޕީއެމްގެ ސެކްރެޓަރީ ޖެނަރަލް މުހައްމަދު ތޮލާލް "މިހާރު" އަށް އިއްޔެ ވިދާޅުވެފައިވާ ގޮތުގައި މިދިޔަ އޮކްޓޯބަރު މަހުން ފެށިގެން މިހާތަނަށް އެ ޕާޓީގެ 5،000 މެމްބަރުން އެހެން ޕާޓީތަކަށް ވައްދާފައިވެ އެވެ.

ޕާޓީގެ މެމްބަރުންގެ އަދަދު މަދުވުމުން އެކަން ހިނގައިދިޔަ ގޮތް އެ މެމްބަރުންނަށް ގުޅައިގެން ބަލާފައިވާ ކަމަށާއި އޭގެތެރެއިން 90 ޕަސެންޓް މީހުން އެހެން ޕާޓީއަކަށް ސޮއިނުކުރާ ކަމަށް ބުނެފައިވާ ކަމަށް ތޮލާލް ވިދާޅުވި އެވެ.

ފުއާދު ވިދާޅުވީ އެއްފަހަރާ 5،000 މެމްބަރުން އެއް ޕާޓީން އަނެއް ޕާޓީއަށް ބަދަލުވެފައިނުވާ ކަމަށެވެ. ސިޔާސީ މަސްރަހަށް އަންނަ ބަދަލުތަކުގެ ސަބަބުން، ވެރިކަންކުރާ ޕާޓީ ނުވަތަ ކޯލިޝަން ޕާޓީއަށް ބަދަލުވާ ބަޔަކު ވެސް އުޅޭތީ އެގޮތަށް މެމްބަރުން ބަދަލުވުމަކީ ނުވާނެ ކަމެއް ނޫން ކަމަށް އޭނާ ވިދާޅުވި އެވެ.

އެކަމަކު، އެ ޝަކުވާތަކާ ހެދި ޕާޓީތަކުގެ ރަޖިސްޓްރޭޝަން ބަލަހައްޓާ ސެކްޝަންގެ އޮޑިޓެއް ހަދަން ނިންމާފައިވާ ކަމަށް ފުއާދު ވިދާޅުވި އެވެ.

"އާއްމު އުސޫލުގެ ތެރެއިން އިންޓާނަލް އޮޑިޓް ހަދާނެ. އެކަމަކު ޕީޕީއެމުން އެ ޝަކުވާތައް ކުރުމުން މި އިސްކަން ދިނީ އެކަމަށް،" އޭނާ ވިދާޅުވި އެވެ.

ފުއާދު ވިދާޅުވީ އޮޑިޓު ހެދުމަށް ފަހު އީސީގެ ތެރެއިން މައްސަލަތަކެއް އުޅޭ ނަމަ އެކަން ބަލާނެ ކަމަށެވެ. އަދި މުވައްޒަފަކު އިހުމާލުވާ ނަމަ ހަރުކަށި ފިޔަވަޅު އަޅާނެ ކަމަށް ވެސް އޭނާ ވިދާޅުވި އެވެ.

"ވަރަށް ބޮޑަށް ޔަގީންކަން އޮވޭ އީސީގެ ތެރެއިން މިކަން ނުވާނެކަން. ކޮމިޝަންގެ ނަން ހަރާބުވާ ކަހަލަ އެއްވެސް ކަމެއް ކުރާކަށް ބޭނުމެއް ނުވޭ،" ފުއާދު ވިދާޅުވި އެވެ.

އޭނާ ވިދާޅުވީ ބައެއް ފަހަރު ރުހުމުގައި ޕާޓީ ބަދަލުކުރުމަށް ފަހު، އެކަން އިތުރަށް ބަލަން ޕާޓީން ގުޅުމުން އެކަން ކޮށްފައިވަނީ ރުހުމުގައި ނޫންކަމަށް ވެސް ބުނެފައި ހުންނަ ކަމަށެވެ.