އެމެރިކާގައި ބަޑީގެ ހަމަލާ ދިން މީހާގެ މައްސަލައެއް ކުރިން ތަހުގީގު ކުރި: އެފްބީއައި

ފްލޮރިޑާ (ޖޫން 13) - އެމެރިކާގެ ފްލޮރިޑާގެ ނައިޓް ކްލަބަކަށް ބަޑިން ހަމަލާދީ 50 މީހުން މަރާލި އުމަރު މަތީނަކީ ޖާނުންފިދާވެގެން ބަޑީގެ ހަމަލާ ދިން އެމެރިކާ މީހަކާ ގުޅުން އޮތް ކަމަށް ބެލެވިގެން މައްސަލައެއް ތަހުގީގުކޮށްފައިވާ މީހެއް ކަމަށް އެފްބީއައި އިން ބުނެފި އެވެ.

އެފްބީއައިގެ ސްޕެޝަލް އެޖެންޓް ރޮނާލްޑް ހޮޕާ ވިދާޅުވީ އުމުރުން 29 އަހަރުގެ މަތީން އެ މައްސަލަ އިން ސަލާމަތްވި ނަމަވެސް އިސްލާމިކް ސްޓޭޓް (އައިއެސް)އާ ގުޅުން އޮންނަ ކަމަށް ބެލެވޭ ކަމަށެވެ.

އެޖެންޓް ވިދާޅުވީ ހައްދުފަހަނަޅާފައިވާ ބަޔަކާ ގުޅުން އޮތް ކަމަށް ބެލެވިގެން މަތީންގެ މައްސަލަ ދެ ފަހަރަކަށް އެފްބީއައިގެ ސަމާލު ކަމަށް އައިސްފައިވާ ކަމަށެވެ.

"ޓެރަރިސްޓުންނާ ގުޅުން އޮތް ކަމަށް ބެލެވިގެން ފުރަތަމަ އޭނާގެ މައްސަލަ ތަހުގީގު ކުރީ 2013 ވަނަ އަހަރު. އެފްބީއައި އިން އެ މައްސަލަ ވަނީ ވަރަށް ރަނގަޅަށް ތަހުގީގުކޮށްފައި. މަތީންއާ ދެ ފަހަރަށް ވަނީ ސުވާލުކޮށްފައި. އޭގެ ފަހުން ކުށެއް ސާބިތުވާން ނެތުމުން އެ މައްސަލަ ވަނީ ބަންދުކުރެވިފައި. އެކަމަކު އޭގެ ފަހުން ވަނީ ސީރިއާގައި ފުރަތަމަ ޖާނުންފިދާވުމުގެ ހަމަލާ ދިން އެމެރިކާ މީހާ ކަމަށްވާ މުނާރު މުހައްމަދު އަބޫސައްލާއާ ގުޅުން އޮތް ކަމަށް ބެލެވިގެން ސުވާލުކޮށްފައި. ނަމަވެސް އޭރު އޭނާ އަކީ ނުރައްކަލެއް ކަމަށް ނުބެލެވޭ،" ނޫސްވެރިންނާ ވާހަކަ ދައްކަވަމުން ހޮޕާ ވިދާޅުވި އެވެ.

މަތީން އަށް ފްލޮރިޑާގައި ބަޑި ގެންގުޅުމުގެ ލައިސަންސް ލިބުނު ގޮތާއި ހަމަލާގެ ކުޑަ ވަގުތު ކޮޅެއް ކުރިން އޭނާ އަށް ދެ ބަޑި ގަނެވުނީ ކިހިނެއްތޯ ސުވާލު ކުރުމުން ހޮޕާ ވިދާޅުވީ މަތީން އަކީ ހަރުކަށި ވިސްނުމުގެ މީހެއް ކަމަށް ނިންމާފައި ނުވާ ކަމަށެވެ.

ފްލޮރިޑާގެ އޯލެންޑޯގައި އެއްޖިއްސުން ގުޅުން ހިންގާ ފިރިހެނުންގެ ނައިޓް ކްލަބުގައި ހަމަލާ ދިނުމުގެ ކުރިން 911 އަށް ފޯނުކޮށް އައިއެސްއާ އޭނާ ގުޅުން އޮންނަ ކަމަށް ބުނެފައިވާ ކަމަށް ހޮޕާ ވެސް ވިދާޅުވި އެވެ.

އައިއެސް އިން ވެސް ވަނީ އޯލެންޑޯގެ ހަމަލާގެ ފަހަތުގައި ވަނީ އެ ޖަމާއަތުން ކަމަށް ބުނެފަ އެވެ.

މިއީ އެމެރިކާގެ ފަހުގެ ތާރީޚުގައި ދިން ބަޑީގެ އެންމެ ނުރައްކާ ހަމަލާ އެވެ. ހަމަލާ އަށް ފަހު ރައީސް ބަރަކް އޮބާމާ ދެއްވި ބަޔާނުގައި ވަނީ ކުށެއް ނެތް އެތައް ބަޔަކު މަރާލުމަކީ އެމެރިކާގައި ނުރައްކާތެރި ހަތިޔާރު ލިބޭލެއް ފަސޭހަކަން ހަނދާންކޮށްދޭ ކަމެއް ކަމަށް ވިދާޅުވެފަ އެވެ. ހިތާމައާ ގުޅިގެން އޮބާމާ ވަނީ ސަރުކާރުގެ ހުރިހާ އިމާރާތްތަކުން ވެސް ބުރާސްފަތި ދުވަހާ ހަމައަށް ބައި ދަނޑި އަށް ދިދަ ތިރިކޮށްފައި ބެހެއްޓުމަށް އަންގަވައިފަ އެވެ.