ހީވަނީ އަލުން ދުނިޔެއަށް އާދެވުނުހެން: ރަން ވަޅުން ސަލާމަތްވި މީހެއް

ބެއިޖިން (ޖެނުއަރީ 27) - ޗައިނާގެ ރަން ނަގާ ވަޅެއްގައި 2،000 ފޫޓަށް ވުރެ އަޑީގައި ދެ ހަފުތާ އަށް ވުރެ ގިނަ ދުވަހު ތާށިވެފައި ތިބުމަށް ފަހު މިދިޔަ އާދިއްތަ ދުވަހު ސަލާމަތްކުރި 11 މީހުންގެ ތެރޭގައި ހިމެނޭ ދެ މީހަކު ސިފަކުރި ގޮތުގައި "މިއީ އަލުން ދުނިޔެ އަށް އުފަންވުން" ފަދަ ކަމެކެވެ.

ޗައިނާގެ އިރުމަތީގެ ޝަންޑޮން ޕްރޮވިންސްގެ ރަން ނަގާ ވަޅެއްގެ ކައިރީގައި ބާރު އެއްޗެއް ގޮވުމުގެ ސަބަބުން އެ ވަޅުން މައްޗަށް އަރޭނެ ގޮތެއް ނެތި 22 މީހުން ބަންދުވީ ޖެނުއަރީ 10 ވަނަ ދުވަހު އެވެ. އެގާރަ މީހުން ސަލާމަތްކުރި އިރު ނުވަ މީހަކު މަރުވެފައިވާ ކަން ވަނީ ޔަގީންވެފަ އެވެ. އިތުރު ދެ މީހަކަށް ވީނުވީ ގޮތެއް އަދި ނޭނގެ އެވެ.

"އަހަންނަށް ހީވަނީ އަލުން އުފަންވީހެން،" ރަން ވަޅުން ސަލާމަތްކުރި އެކަކު ކަމަށްވާ ޑޫ ނަމަކަށް ކިޔާ މީހަކު ހޮސްޕިޓަލްގައި އޮވެ ރަސްމީ ޓީވީ ސީޖީޓީއެން އަށް ބުންޏެވެ. "ފުރަތަމަ ނުވަ ދުވަހު ކާނެ އެއްވެސް އެއްޗެއް ނުލިބޭ. އެހެންވެ އަހަރެމެން ސަލާމަތްވުމުން ލިބުނު އުފާ ކިޔައިދޭން ވެސް ނޭނގޭ. އެހާ ބޮޑަށް ހިތްހަމަޖެހިފައި މި ތިބީ."

ޑޫ އަކީ ރަން ވަޅުގައި ތާށިވި މީހުންގެ ތެރޭން ޖެނުއަރީ 17 ވަނަ ދުވަހު ސަލާމަތުން ތިބިކަން އެނގުނު 11 މީހުންގެ ތެރޭން އެކަކެވެ. އެ މީހުން ދިރި ތިބިކަން އެނގުނީ ރަން ވަޅަށް ބޭލި ވަލެއްގައި އެތެރޭން ހިފައި ދެމުމުންނެވެ. އޭގެ ފަހުން ވަނީ ވަޅަށް ކަރުދާހާއި ފަންސުރު ބާލައިފަ އެވެ. އޭގެ ފަހުން އެ ކަރުދާހުގައި ނޯޓެއް ލިޔެ އެ މީހުން ވަނީ ވަލުގައި އައްސާފައި ފޮނުވައިފަ އެވެ. އޭގެ ފަހުން އެ މީހުންނަށް ވަނީ ކާބޯތަކެއްޗާއި ބޭސް ފޮނުވައިފަ އެވެ. އަދި މުވާސަލާތު ކުރަން ފޯނު ލައިނެއް ވެސް ގާއިމްކުރި އެވެ.

"އަހަރެމެންނަށް އެނގޭ އެހާ އަޑިން މީހުން ސަލާމަތް ކުރުމަކީ ކިހާ އުނދަގޫ ކަމެއްކަން. އަހަރެން ތިބީ ބިމުން ފެށިގެން ގާތްގަނޑަކަށް 600 މީޓަރު އަޑީގައި،" ސަލާމަތް ކުރި އެހެން މީހެއް ކަމަށްވާ ވަންގް ބުންޏެވެ. "އެންމެން ވެސް ވަރަށް އުފާވި ސަލާމަތްވުމުން."

ޑޫ ބުނީ ވަޅުތެރޭގައި ތިބި އިރު އެކަކު އަނެކަކަށް ދިޔައީ ހިތްވަރު ދެމުން ކަމަށެވެ. ބައެއް މީހުން އުއްމީދު ކަނޑާލި އިރު އަނެއް ބަޔަކު އުއްމީދުގައި ތިބި ކަމަށް އޭނާ ބުންޏެވެ.

އޮފިޝަލުން ބުނެފައި ވަނީ ރަން ނަގާ ވަޅުން ސަލާމަތް ކުރި 11 މީހުންގެ ހާލު ވެސް ރަނގަޅު ކަމަށެވެ. އެ މީހުންނަށް މި ވަގުތު ދަނީ ހޮސްޕިޓަލުން ފަރުވާ ދެމުންނެވެ.